Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxx. Psalm.

Exultate Deo.

1[2]

LOeft met verhueghen God onsen helpere, singhet vrolijck den Godt van Iacob.

2[3]

Neemt den lofsanck, ende gheuet die bomme, dat ghenuechlijck psalter spel metter herpen.

3[4]

Slaet in die nieuwe maent metten trompette, opden vermaerden dach van uwer hoochfeesten.

4[5]

Want tis een ghebodt in Israel, ende een recht den Godt van Iacob.

5[6]

Hy heeft dat tot een ghetuygenisse in Ioseph ghestelt, als hy wt ghinck wten lande van Egipten die tale die hy niet en kende heeft hy ghehoort.

6[7]

Hy heeft sijnen rugghe afghekeert vanden lasten, sijn handen hebben inden corf ghedient.

7[8]

In die tribulacie hebdy my aenroepen, ende ick heb v verlost, ick heb v verhoort in die verborghenthede des tempeests, ick heb v gheproeft by dwater des wedersegghens.

8[9]

Hoort mijn volck ende ick sal v betuyghen, Israhel eest dat ghy my hoort,

9[10]

soo en sal onder v gheen nieuwe Godt sijn, noch ghy en sult gheenen vreemden Godt aenbidden.

10[11]

Want ick ben die Heere uwe Godt, die v gheleyt hebbe wten lande van Egipten, doet uwen mont wijt open, ende ick sal dien veruullen.

11[12]

Ende mijn volc en heeft mijn stemme niet ghehoort, ende Israel en heeft op my niet ghemerct.

[p. *471]

12[13]

Ende ick hebse ghelaten nae haers herten begheerten, sij sullen gaen in hen vonden.

13[14]

Hadde mijn volck my ghehoort, hadde Israhel in mijn weghen ghewandelt.

14[15]

So soude ic messchien om niet hen vianden vernedert hebben, ende ouer die ghene die hen verdrucken soude ick mijn hant ghesonden hebben.

15[16]

Die vianden des Heeren hebben hem gheloghen, ende haren tijt sal inder eewicheyt sijn.

16[17]

Ende hy heeftse ghespijst van die bloeme der tarwen, ende wten steen heeft hijse met honich versaet.