Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxix. Psalm.

Qui regis Israel.

1[2]

DIe Israhel regeert merct aen, die Ioseph leydt als een scaep.

Ghy die sittet op die Cherubims, wort verthoont

2[3]

voor Ephraim, Bemiamin, ende Manasse.

Verwect v machticheyt, ende coemt dat ghy ons salich maket.

3[4]

Godt bekeert ons, ende verthoont v aensicht, ende wij sullen salich sijn.

4[5]

Heere Godt der heyrcrachten, hoe langhe suldy gram wesen op tghebedt ws dienaers.

5[6]

Ghy sult ons spijsen metten broode der tranen, ende dranck suldi ons gheuen met tranen by mate.

6[7]

Ghy hebt ons ghesteldt tot een wedersegghen onsen ghebueren, ende onse vianden hebben ons bescimpt.

7[8]

Godt der heyrcrachten bekeert ons, ende verthoont v aensicht, ende wij sullen salich sijn.

8[9]

Eenen wijngaert hebdi wt Egipten ouergebracht, ghi hebt die Heydenen wtgeworpen ende dien gheplant.

9[10]

Die leytsman des wechs hebdi gheweest voor sijn aenscouwen, ende ghy hebt sijn wortelen gheplant, ende hy heeft die eerde veruult.

10[11]

Sijn scaduwe heeft die berghen ouerdect, ende sijn spruyten die cederboomen Godts.

11[12]

Hy heeft sijn rancken wtghestrect totter zee, ende totten vloet sijn schueten.

12[13]

Waerom hebdy dan sijnen thuyn ghebroken, ende waerom snijden sij sijnen wijn af alle die voorby den wech gaen?

13[14]

Dat wilt swijn wten bosch heeft dien verdoruen, ende een sonderlinghe wilt dier heeft dien af gheten.

14[15]

Godt der heyrcrachten keert v omme, siet nederwaerts vanden hemel, ende besiet, ende besoect desen wijngaert.

15[16]

Ende volmaect dien den welcken v rechte handt gheplant heeft, ende ouer des menschen soon dien ghy v gheuesticht hebt.

16[17]

Watter verbrant is metten vier ende ondergrauen, dat sal van die straffinghe ws aensichts vergaen.

17[18]

Laet v handt sijn op den man van uwer rechter handt, ende op den sone des menschen den welcke ghy voor v gheuesticht hebt.

18[19]

Ende wij en sceyden van v niet, ghy sult ons leuende maken, ende uwen naem sullen wij aenroepen.

19[20]

Heere Godt der heyrcrachten bekeert ons, ende vertoont v aensicht, ende wij sullen salich wesen.

[afbeelding]