Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]GOdt wie sal ws ghelijck sijn? en swijcht niet Godt, noch en laet v niet bedwinghen. | |
2[3]Want siet v vianden hebben gheluyt ghemaect, ende die v haten hebben thooft opghehauen. | |
3[4]Op v volck hebben sij eenen quaden raet ghesloten, ende sij hebben ghedacht teghen v heylighen. | |
4[5]Sij hebben gheseyt. Coemt ende laet ons die vernielen wten volcke, ende en laet gheen ghedenckenisse meer wesen van Israels naem. | |
5[6]Want sij hebbent eendrachtelijck ghepeyst, tsamen hebben sij teghen v een verbont ghemaect, | |
6[7]die tabernakelen der Idumiten ende die Ismaheliten. Moab ende die Agarenen, | |
7[8]Gebal, ende Ammon, ende Amalec die vreemdelinghen metten ghenen die in Tyro woonen. | |
8[9]Want Assur is oock met hen comen, sij sijn gheworden ter helpen Lodts kinderen. | |
9[10]Doet hen ghelijck Madian ende Sisare, ghelijck Iabin in die beke Cisson. | |
10[11]Sij sijn vergaen in Endor, gheworden sijn sij als den dreck der eerden. | |
11[12]Steldt hen princen ghelijck Oreb ende Zeb, ende Zebee ende Salmana. | |
12[13]Allen hen princen die gheseyt hebben, laet ons tot erffenisse besitten Godts heylighe plaetse. | |
13[14]Mijn Godt stelt die als een radt, ende ghelijck stroo voor daensicht des wints. | |
14[15]Ghelijck tvier dat een bosschagie verbrant, ende als een vlamme die berghen verbernende. | |
15[16]Alsoo suldi hen veruolghen in uwen tempeest, ende in uwe gramscappe suldise verstooren. | |
16[17]Veruult hen aensicht met scanden, ende dan sullen sij uwen naem soecken Heere. | |
17[18]Laetse hen scamen ende verbaest wesen in die eeuwe der eeuwen, ende laetse beschaemt worden ende vergaen. | |
18[19]Ende laetse kennen dat uwen naem is die Heere, dat ghy alleen sijt dalderhoochste ouer alle die eerde. |
|