Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxvij. Psalm.

Attendite popule meus.

1

MErct neerstelijck mijn volck op mijn wet, neycht v oore tot die woorden mijns monts.

2

Ick sal in ghelijckenissen mijnen mont open doen, ick sal voor redenen spreken vant beghinsel.

3

Hoe groote dinghen hebben wij ghehoort ende die ghesien, ende onse vaderen hebbent ons vertelt.

4

Sij en sijn niet verborghen voor hen kinderen in dat ander gheslachte.

Vertellende die louen des Heeren, ende sijn crachten, ende sijn wonderlijcke dinghen die hy ghedaen heeft.

5

Ende hy heeft een ghetuyghenisse verwect in Iacob, ende een wet heeft hy ghesteldt in Israel.

Hoe groote dinghen heeft hy beuolen onsen vaderen, om die te kennen te gheuen haren kinderen

6

op dat het ander gheslachte dat bekennen soude.

Die kinderen die gheboren sullen worden, ende opstaen, ende die sullent vertellen haren kinderen.

7

Op dat sij in Gode hen hope moghen stellen, ende niet en vergheten die wercken Godts, ende dat sij sijn gheboden ondersoecken.

8

Dat sij niet en worden ghelijck hen vaderen, een quaet gheslacht ende vertorende.

Een gheslachte dat sijn herte niet ghescict en heeft ende welcks gheest met Godt niet en is ghetrouwe gheweest.

9

Die kinderen van Ephrem den boghe spannende ende af scietende, sijn ommeghekeert inden dach des strijdts.

10

Sij en hebben niet bewaert dat testament Godts, ende in sijn wet en hebben sij niet willen wandelen.

11

Ende sij hebben sijn weldaden vergheten, ende die wonderlijcke dinghen die hy hen ghetoont heeft.

12

Voor hen vaderen heeft hy wonderlijcke dinghen ghedaen, int landt van Egypten, int velt van Taneos.

13

Hy heeft die zee int midden ghescoert, ende hen daer door gheleydt, ende hy heeft die wateren ghesteldt als in een flessche.

14

Ende hy heeft gheleyt met een wolcke des daechs, ende den gheheelen nacht met verlichten des viers.

15

Hi heeft ghescoert die steenrootse in die woestijne, ende hi heeftse ghewatert als in eenen grooten afgront.

16

Ende hy heeft water wten steen ghebracht, ende hy heefter wateren ghelijck riuieren wtgheleydt.

17

Ende sij hebben daer noch toe ghedaen om teghen hem te sondighen, sij hebben tot gramscap verect den hoochsten in die plaetse sonder water.

18

Ende sij hebben Godt ghetempteert in hen herten, dat sij begheerden spijssel voor hen zielen.

19

Ende sij hebben qualijck ghesproken van Gode, si hebben gheseyt, sal Godt oock moghen een tafel bereyden in die woestijne?

20

Want hy heeft die steenrootse gheslaghen, ende die wateren vloedden, ende die beken liepen ouer.

[p. *469]

Sal hy oock moghen broot gheuen, oft een tafel bereyden sijnen volcke?

21

Daerom heuet die Heere ghehoort, ende wtghesteldt, ende tvier is ontsteken in Iacob, ende die gramscap is opgheclommen in Israel.

22

Om dat sij niet en hebben ghelooft in Godt, noch ghehoept in sijn salicheyt.

23

Ende hy heeft gheboden den wolcken van bouen, ende die doeren des hemels open ghedaen.

24

Ende hy heeft hen ghereghent manna om teten, ende hemels broot heeft hy hen ghegheuen.

25

Der enghelen broot heeft die mensch gheten, hy heeft hen spijse ghesonden in oueruloedicheyt.

26

Hy heeft den suyden wint wech ghenomen vanden hemel, ende met sijnder macht den westen wint gebracht.

27

Ende hy heeft op hen vleesch ghereghent ghelijck stof, ende ghelijc dat sandt der zee gheuederde vogelen.

28

Ende sij sijn gheuallen int midden van haren legheren, omtrent hen tabernakelen.

29

Ende sij hebben gheten ende sijn versaet gheworden wter maten seere, ende hen begheerte heeft hy hen aenghebracht,

30

sij en sijn niet berooft van haren luste.

Noch waren hen spijsen in haren mont,

31

ende die gramscap Godts is ouer hen ghecomen.

Ende hy heeft hen vette doot gheslaghen, ende die wtghecoren van Israel heeft hy beledt.

32

In alle dese dinghen hebben sij noch ghesondicht, ende en hebben niet ghelooft in sijn wonderlijcheden.

33

Ende hen daghen sijn vergaen in ydelheden, ende hen iaren met haesticheyt.

34

Als hijse doodde soo sochten sij hem, ende sij keerden wederom, ende des morghens vroech quamen sij tot hem.

35

Ende sij sijn ghedachtich worden dat Godt hen helper is, ende dat die hooghe Godt hen verlosser is.

36

Ende sij hebben hem lief ghehadt in haren mont, ende met hen tonghe hebben sij hem gheloghen.

37

Maer hen herte en was niet recht met hem, noch sij en sijn niet voor ghetrouwe ghehouden in sijn verbont.

38

Maer hy is bermhertich, ende sal ghenadich worden haren sonden, ende hy en salse niet heel vernielen.

Ende hy is seer milt gheweest dat hi sijn gramscap afkeeren soude, ende hy en heeft alle sijn gramscap niet ontsteken.

39

Ende hy is ghedachtich gheweest dat sij vleesch sijn, eenen gheest gaende ende niet wedercomende.

40

Hoe dicmael hebben sij hem ghecreyt in die woestijne, ende tot gramscap verwect in dat lant sonder water?

41

ende sij sijn ommeghekeert ende hebben God ghetempteert, ende den heylighen van Israel hebben sij verbittert.

42

Sijn en sijn niet ghedachtich gheweest sijnder hant, des daechs doen hijse verloste wt die handt des verdruckers.

43

Ghelijc hy sijn teekenen in Egipten ghestelt heeft, ende sijn wonderlijcke wercken int velt van Taneos.

44

Ende hy heeft hen vloeden in bloet verkeert, ende hen reghenen dat sij niet drincken en souden.

45

Hy heeft op hen vlieghen ghesonden, ende die hebbense gheten, ende vorsschen, ende die hebbense vernielt.

46

Ende hy heeft hen vruchten der versengtheyt ghegheuen, ende haren arbeydt den sprinchanen.

47

Ende hy heeft metten haghel hen wijngaerden ghedoodt, ende hen moerboomen door den rijme.

48

Ende hy heeft hen beesten den haghel gheleuert, ende hen besittinghe den viere.

49

Hy heeft op hen ghesonden die gramscap van sijnder verbolghentheyt, verbolghentheyt ende gramscap, ende lijden, invallen door quade enghelen.

50

Hy heeft eenen wech ghemaect den padt sijnder gramscappen, hy en heeft vander doot hen zielen niet ghespaert, ende hen behelpighe beesten heeft hi in die doodt besloten.

51

Ende hy heeft gheslaghen alle dierste gheborene in dlant van Egipten, dierste vruchten van allen haren arbeyt, in Chams tabernakelen.

52

Ende hy heeft sijn volck wech ghenomen ghelijc scapen, ende die gheleydt als een cudde in die woestijne.

53

Ende hy heeftse wtgheleydt in die hope, ende sij en hebben niet gheureest, ende die zee heeft hen vianden ouerdect.

54

Ende hy heeftse gheleydt inden berch van sijnder heylichmakinghen, opden berch den welcken sijn rechte hant vercreghen heeft.

Ende hy heeft van haren aensicht die Heydenen wtgheworpen, ende metten lote heeft hy dlant ghedeelt door tcoordeken der deylinghen.

55

Ende hy heeft in hen tabernakelen doen woonen, die gheslachten van Israel.

56

Ende sij hebben ghetempteert, ende verbittert den hooghen Godt, ende sijn ghetuyghenissen en hebben sij niet bewaert.

57

Ende sij hebben hen afghekeert, ende niet ghehouden tverbont, ghelijck hen vaderen sijn si omghekeert tot eenen quaden boghe.

58

Tot gramscap hebben sij hem verwect in hen hueuelen, ende in hen ghesneden beelden hebben sij hem tot toornicheyt verwect.

59

Godt heuet ghehoort, ende versmaet, ende hy heeft Israel seer te niet ghebracht.

60

Ende hi heeft verstooten het tabernakel van Silo, sijn tabernakel daer hi ghewoont heeft onder die menschen.

61

Ende hy heeft hen macht gheleuert der gheuangenissen, ende hen scoonheyt inder vianden handen.

62

Ende hy heeft sijn volck int sweert besloten, ende sijn erffenisse heeft hy versmaedt.

63

Hen ionghelinghen heuet tvier gheten, ende hen maechden en werden niet beclaecht.

64

Hen priesters sijn doort sweert gheuallen, ende hen weduwen en werden niet beweent.

65

Ende die Heere is ontwaect als een die slaept, ende als een machtighe die droncken gheweest is van wijne.

66

Ende hy heeft sijn vianden gheslaghen in dachterste, een eewich verwijt heeft hy hen ghegheuen.

67

Ende hy heeft verstooten dat tabernakel van Ioseph, ende tgheslachte van Ephraim en heeft hy niet vercosen.

68

Maer hy heeft vercoren tgheslachte van Iuda, den berch van Sion den welcken hy bemint heeft.

69

Ende hy heeft ghetimmert als der eenhorenen sijn heylige plaetse in dlant, dat hy ghefundeert heeft in die eewicheyt.

70

Ende hy heeft vercoren Dauid sijnen knecht, ende heeft hem opghenomen van die cudden der scapen, van achter die bevruchte scapen heeft hy hem ghenomen.

71

Om te voeden Iacob sijnen knecht, ende Israel sijn erffenisse.

72

Ende hy heeftse gheuoedt in die onnooselheyt sijns herten, ende door die verstandicheden sijnder handen heeft hijse gheleydt.