Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]MEt mijnder stemmen heb ick totten Heere gheroepen, met mijnder stemmen tot God, ende hy heeft op my gheledt. | |
2[3]Inden dach mijns lijdens heb ick Godt versocht, met mijnen handen des nachts teghen hem, ende ick en ben niet bedroghen. Mijn ziele heeft gheweyghert ghetroost te sijne, | |
3[4]ick heb Godts ghedachtich gheweest, ende ick heb vruecht ghehadt, ende ick ben gheoeffent, ende mijnen gheest werde flau. | |
4[5]Mijn ooghen hebben die waken voorcomen, ick ben verbaest gheweest, ende en heb niet ghesproken. | |
5[6]Ick heb ghedacht op die oude daghen, ende die eewighe iaren heb ick in mijn ouerdencken ghehadt. | |
6[7]Ende ick heb bedacht des nachts met mijn herte, ende ick worde gheoeffent, ende vaechde mijnen gheest. | |
7[8]Sal God inder eewicheyt verworpen, oft en sal hy daer niet toe doen dat hy noch ghenadigher ware. | |
8[9]Oft sal hy totten eynde sijn bermherticheyt af snijden, van gheboerten tot gheboerten? | |
9[10]Oft sal Godt vergheten te ontfermen? oft sal hi in sijn gramscap sijn bermherticheden onthouden. | |
10[11]Ende ick heb gheseyt, nv heb ick begonst dits die veranderinghe des rechter hants vanden hooghen. | |
11[12]Ick heb ghedachtich gheweest der wercken des Heeren, want ick sal ghedachtich wesen vant beghinsel uwer wonderlijcheden. | |
12[13]Ende ick sal my bedencken in uwe wercken, ende in v vonden sal ick gheoeffent worden. | |
13[14]Godt inden heylighen is uwen wech, wie isser een groot Godt ghelijc ons God? | |
14[15]ghy sijt God die wonderlijcke dinghen doet. Ghi hebt bekent ghemaect in die volcken v cracht, | |
15[16]ghy hebt door uwen arm v volck verlost, die kinderen van Iacob ende Ioseph. | |
16[17]Godt die wateren hebben v ghesien, die wateren hebben v ghesien, ende gheureest, ende die afgronden sijn verscrict gheweest. | |
17[18]Die menichte van tgheluyt der wateren, een stemme hebben die wolcken ghegheuen. Want v schichten gaen voorby, | |
18[19]die stemme van uwen dondere is int radt. V blixemen hebben ghelicht opden omganck der aerden, die eerde is beroert gheweest ende heeft gebeeft. | |
19[20]In die zee is uwen wech, ende v paden in veel wateren, ende v voetstappen en sullen niet bekent worden. | |
20[21]Ghy hebt ghelijck scapen v volck gheleydt, door die hant van Moyses ende Aaron. |
|