Den gheheelen Bybel, Inhoudende het oude ende nieuwe Testament (Leuvense bijbel 1548)



Den .lxxv. Psalm. Notus in Iudea Deus.
[pagina *468]

1[2] GOdt is bekent int Ioetsche lant, in Israel sijnen grooten naem.
2[3] Ende in vrede is sijn plaetse ghemaect, ende sijn wooninghe in Sion.
3[4] Daer heeft hy ghebroken die machticheden, den boghe, den scilt, tsweert, ende den strijdt.
4[5] Ghy verlichtende wonderlijck van die eewighe berghen,
5[6] verbaest sijn gheworden alle die onwijse van herten. Sij hebben haren slaep gheslapen, ende alle die mannen der rijckdommen en hebben niet gheuonden in hen handen.
6[7] Van uwer straffinghen Godt van Iacob, hebben sij ghesluymert alle die op peerden clommen.
7[8] Ghy sijt veruaerlijck, ende wie sal v wederstaen? van doen is v gramscap.
8[9] Vanden hemel hebdi dat ordeel doen hooren, die eerde heeft ghebeeft ende gherust.
9[10] Doen Godt op stont ten ordeel, om dat hy behouden soude alle die saechtmoedighe der eerden.
10[11] Want dat ghepeys des menschen sal v belijden, ende die ouerbleuelinghen des ghepeys sullen v eenen feestelijcken dach houden.
11[12] Gheloeft ende betaelt den Heere uwen Godt alle die rontsomme hem ghiften aenbrengt. Den veruaerlijcken,
12[13] ende hem die der princen gheest wech neemt, den veruaerlijcken by die coninghen der aerden.