Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]GOdt v betaemt loff sanck in Sion, ende v sal die beloefte betaelt worden in Ierusalem. | |
2[3]Verhoort mijn ghebedt, tot v sal alle vleesch comen. | |
3[4]Die woerden vanden boosen sijn machtigher gheworden dan wy, ende onser boosheden suldi ghenadich zijn. | |
4[5]Salich is hy den welcken ghi vercoren hebt ende aenghenomen, hy sal woonen in v voerhouen Wy sullen veruult worden met die goeden ws huys, heylich is uwen tempel, | |
5[6]wonderlijc in die gherechticheyt. Verhoort ons Godt onse salichmaker, die hope van alle die eynden des eertrijcs ende verre die zee. | |
6[7]Bereydende die berghen in v cracht, omgort met machticheyt, | |
7[8]die verstoort die diepte der zee, dat gheluyt van haren baren. Die Heydenen sullen verbaest worden, | |
8[9]ende vreesen sullen sij van uwen teekenen, die op die eerde woonen, die wtganghen vanden morghenstont ende vanden auontstont suldi ghenoechlijck maken. | |
9[10]Ghy hebt die eerde besocht ende die heel vochtich ghemaect, ghy hebt vermenichfuldicht haer rijck te maken. Den vloet Godts is veruult met wateren ghy hebt hen spijse bereyt, want alsoe is haer bereytsele. | |
10[11]Haer rijuieren maect droncken, vermenichfuldicht haer spruyten, in haer reghendruppelen sal sij groeyende verblijden. | |
11[12]Ghy sult ghebenedijden die croone des iaers van uwer goedertierenheyt, ende v velden sullen veruult worden met vruchtbaerheyt. | |
12[13]Vet sullen worden die schoon plaetsen der woestijnen, ende met vrolijcheyt sullen die hueuelen omvaen worden. | |
13[14]Die rammen der schapen zijn ghecleedt, ende die valleyen sullen oueruloedich zijn van terwe, zij sullen roepen ende certeyn loff sanck segghen. |
|