Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxv. Psalm.

Iubilate Deo omnis terra.

1

MAect iolijt Gode alle die aerde,

2

segt eenen psalter loff zijnen naem, gheeft glorie zijnen loue.

3

Segghet Gode, hoe vreesselijck zijn v wercken, Heere? in die menichte van uwer cracht sullen v vianden v lieghen.

4

Alle aertrijcke aenbede v, ende singhe v loff, ende segghe loff sanck uwen name.

5

Coemt ende besiet Gods wercken, veruaerlijck in zijn raden op die kinderen der menschen.

6

Die de zee in droochte verkeert, in den vloet sullen zij te voete gaen, daer sullen wy blijde zijn in hem.

7

Die doer zijn macht heerscappie heeft inder eewicheyt, zijn ooghen sien op die Heydenen, die hem vergrammen en moeten niet verhauen worden, in hen seluen.

8

Ghebenedijt ghy Heydenen onsen Godt, ende doet hooren die stemme sijns loefs.

9

Die mijn ziele ghestelt heeft totten leuen, ende mijn voeten niet en heeft ghegheuen ter beroeringhen.

10

Want ghy Godt hebt ons gheproeft, metten vier hebdi ons ondersocht, ghelijck tsiluer ondersocht wort.

11

Ghy hebt ons gheleyt in den strick, ghy hebt tribulacien op onsen rugghe gheleyt,

12

ghy hebt menschen ouer onse hoofden ghestelt.

Wy sijn ghegaen doert vier ende water, ende ghy hebt ons wt gheleyt tot in die vercoelinghe.

13

Ick sal in v huys gaen met brantofferanden, ick sal v mijn beloeften betalen

14

die mijn lippen ondersceyden hebben.

Ende mijnen mont heeft ghesproken in mijn tribulacie.

15

Brantofferanden vol merchs sal ick v offeren, met den brantoffer der rammen, ick sal v ossen offeren met bocken.

16

Coemt, hoort, ende ick sal vertellen ghy alle die Godt vreest, hoe groote dinghen dat hy mijnder zielen ghedaen heeft.

17

Tot hem heb ick met mijnen monde gheroepen, ende ick heb verhuecht gheweest onder mijn tonghe.

18

Heb ick boosheyt ghesien in mijn herte, soo en salt die Heere niet verhooren.

19

Daer om heeft Godt verhoort, ende waerghenomen die stemme mijns biddens.

20

Ghebenedijt sij Godt, die mijn ghebedt niet affghekeert en heeft, noch sijn bermherticheyt van my.