Den gheheelen Bybel, Inhoudende het oude ende nieuwe Testament (Leuvense bijbel 1548)



Den .lxiij. Psalm. Exaudi Deus orationem.
1[2] VErhoort Godt mijn ghebedt als ic bidde, van die vreese des viants verlost mijn ziele.
2[3] Ghy hebt my bescermt van die vergaderinghe der quaetwilligher, ende van die menichte der gheender die boosheyt doen.
3[4] Want sij hebben als sweerden hen tonghen ghescerpt, sij hebben den booghe ghespannen, die een bitter dinck is
4[5] op dat sij int heymelijck scieten souden den ombesmetten.
5[6] Onuersienlijc sullen sij hem scieten, ende niet vreesen, sij hebben voer hen een boos woert vast voergenomen. Sij hebben vertelt dat sij die stricken souden verborghen, sij hebben gheseyt, Wie salse sien?
6[7] Sij hebben boosheden ondersocht, die ondersoeckers hebben int ondersoecken ghefaelgeert.
[pagina *463]
Die mensch sal gaen tot een hooch herte,
7[8] ende Godt sal verhauen worden. Die pijlen der cleynder kinderen zijn hen quetsueren worden,
8[9] ende hen tonghen zijn teghen hen cranck gheworden. Verstoort sijn zij alle diese saghen,
9[10] ende alle mensch heeft gheureest. Ende zij hebben vercondicht die wercken Gods, ende sijn maecselen hebben sij verstaen.
10[11] Die rechtuerdighe sal hem verblijden in den Heere, ende in hem hopen, ende alle die oprecht van herten sijn sullen gheloeft worden.