Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxxix. Psalm.

Expectans expectaui.

1[2]

VErbeydende heb ick den Heere verbeydt, ende hy heeft op my ghemerct.

2[3]

Ende hy heeft mijn ghebeden verhoort, ende hy hy heeft my gheleydt wt den put der allendicheden, ende vanden slijm des drecs.

Ende hy heeft mijn voeten ghesteldt opden steen, ende mijn ganghen ghescict.

3[4]

Ende hy heeft in mijnen mont ghestelt eenen nieuwen sanck, een liedeken onsen Godt.

Veel menschen sullent sien ende vreesen, ende hopen inden Heere.

4[5]

Salich is die man wiens hope is den naem des Heeren, ende die niet omghesien en heeft nae ydelheden oft valsche rasernien.

5[6]

Heere mijn Godt ghy hebt veel uwer wonderlijcheden ghedaen, ende uwer ghedachten en is niemant ws ghelijck.

Ick hebt vercondicht ende ghesproken, sij sijn verme-

[p. *456]

nichfuldicheyt bouen tghetal.

6[7]

Sacrificie ende offerande en hebdi niet ghewilt, maer die ooren hebdi my volmaect.

Den brantoffer ende den offer voer die sonde en hebdi niet begheert,

7[8]

doen seyde ick, siet ick come.

Int hooft vanden boecke is van my ghescreuen,

8[9]

dat ick uwen wille doen soude, mijn Godt ick hebt ghewilt, ende v wet int midden van mijnder herten.

9[10]

Ick heb v rechtuerdicheyt vercondicht in een groote kercke, siet mijn lippen en sal ick niet verbieden, Heere ghy hebbet gheweten.

10[11]

V rechtuerdicheyt en heb ick niet verborghen in mijn herte, v waerheyt ende v salicheyt heb ick ghesproken.

Ick en heb v bermherticheyt niet verberghen, ende v waerheyt van veel raets.

11[12]

Maer ghy Heere en maect v bermherticheden niet verre van my, v bermherticheyt ende warachticheyt hebben my altijt ontfanghen.

12[13]

Want die quade dinghen hebben my omuanghen derwelcker gheen ghetal en is, mijn boosheden hebben my beuangen, ende ick en hebs niet connen ghesien.

Sij sijn vermenichfuldicht bouen die hairen mijns hoofts, ende mijn herte heeft my verlaten.

13[14]

V belieue Heere dat ghy my verlost, Heere wilt op sien om my te helpen.

14[15]

Laetse bescaemt worden ende te samen vreesen, die mijn siele soeken om die wech te nemen.

Laetse achterwaerts omghekeert worden ende vreesen, die my quaet willen.

15[16]

Laetse haestelijck hen bescaemtheyt draghen, die my segghen wel aen wel aen.

16[17]

Laet verhueghen ende blijde sijn op v alle die v soecken, ende laetse altijt segghen, die uwe salicheyt beminnen, die Heere worde grootelijck geloeft.

17[18]

Want ick ben een bedelaer ende arm, die Heere is voer my besorcht.

Mijn helper ende mijn bescermer sijt ghy, mijn Godt en wilt niet vertoeuen.