Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]ICk heb gheseydt, ic sal mijn weghen bewaren, dat ic niet en soude misdoen met mijn tonghe. Ick heb mijnen mont een hoede ghesteldt, doen die sondaer teghen my stont. | |
2[3]Ick werde stom ende ben vernedert, ende ick heb ghesweghen van tgoede, ende mijn pijne is vernieuwt | |
3[4]Mijn herte is heet gheworden binnen my, ende in mijn aendachte sal tvier seer bernen. [afbeelding] | |
4[5]Ick heb ghesproken met mijn tonghe, maect my kenlijck Heere mijn eynde. Ende tghetal mijnder daghen hoedanich dattet is, op dat ick weten mach wat my ghebreect. | |
5[6]Siet ghy hebt mijn daghen in cleyn mate gestelt, ende mijn substancie als niet voor v. Maer nochtans sijnt ydelheyt, alle leuende menschen. | |
6[7]Maer nochtans soo gaet een mensche voorby ghelijc een beeldt, ende ooc wort hy te vergheefs verstoort. Hy vergadert scatten, ende en weet niet wien dat hy die vergaderen sal. | |
7[8]Ende nv wat is mijn verbeydinge? en is dat niet die Heere? ende mijn substancie is by v. | |
8[9]Van allen mijnen boosheden verlost my, tot eenen scimp hebdy my den onwijsen ghegheuen. | |
9[10]Ick ben stom gheweest ende ick en heb mijnen mont niet open ghedaen want ghy hebbet ghedaen, | |
10[11]keert van my v plaghen. Van die stercheyt uwer hant ben ick verghaen, | |
11[12]in die straffinghen, om die boosheden hebdy den mensche ghecastijt. Ende ghi hebt sijn ziele doen verdwijnen als een spinne, maer nochtans ydelijck wort alle mensch verstoort | |
12[13]Verhoort mijn ghebedt Heere, ende mijn smeekende bidden, wilt met uwen ooren vaten mijn tranen. En swijcht niet, want ick ben een aencomelinc by v, ende een pelgrim ghelijck alle mijn vaders. | |
13[14]Ghedoocht my dat ick mach vercoelt worden eer ick wech gae, ende ick en sal niet meer sijn. |
|