Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]HEere en straft my niet in uwer verbolghentheyt, noch in uwer gramscappen en berispt my niet. | |
2[3]Want v scichten sijn in my gheuesticht, ende ghy hebt op my v hant vast ghemaect. | |
3[4]Daer en is gheen ghesontheyt in mijn vleesch van daensicht uwer gramschap, daer en is gheenen vrede mijnen beenderen, van daensicht mijnder sonder. | |
4[5]Want mijn boosheden sijn bouen mijn hooft ghewassen, ende ghelijck eenen swaren last sijn sij op my beswaert. | |
5[6]Stinckende ende vuyl sijn mijn wonden gheworden, van daensicht mijnder onwijsheyt. | |
6[7]Ick ben catijuich gheworden ende ghecromt totten eynde toe, alle den dach ghinck ick droeffelijck henen. | |
7[8]Want mijn lendenen sijn veruult met bedriechlijcheden, ende daer en is gheen ghesontheyt in mijn vleesch. | |
8[9]Ick ben ghepijnicht ende vernedert bouen maten seere, ick briesschte van dat suchten mijns herten. | |
9[10]Heere voor v is alle die begheerte mijns herten, ende mijn suchten en is voor v niet verborghen. | |
10[11]Mijn herte is heel ontsteldt, mijn cracht heeft my verlaten, ende tselue licht van mijnen ooghen en is met my niet. | |
11[12]Mijn vrinden ende mijn naesten sijn teghen my aenghecomen, ende hebben ghestaen. Ende die by my waren stonden van verre, | |
12[13]ende sij deden ghewelt die mijn ziele sochten. Ende die my quaet sochten hebben ydelheden ghesproken, ende bedroch hebben sij alle den dach bedacht. | |
13[14]Maer ick als een dooue en hoordes niet, ende als een stomme sijnen mont niet open doende. | |
14[15]Ende ick ben gheworden als een mensch die niet en hoort, ende die gheen wederspraeck in sijnen mont en heeft. | |
15[16]Want ick in v Heere ghehoept hebbe, ghi sult my verhooren Heere mijn Godt. | |
16[17]Want ick heb gheseydt. Mijn vianden en moeten hen tot gheender tijt verblijden ouer my, ende als mijn voeten wanckelen, soo hebben sij groote dinghen ouer my ghesproken. | |
17[18]Want ick ben bereedt tot die gheesselen, ende mijn pijne is voor mijn aensicht altijt. | |
18[19]Want ick sal mijn boosheyt vercondighen, ende dencken voor mijn sonde. | |
19[20]Maer mijn vianden leuen, ende sij sijn gheuesticht op my, ende sij sijn vermenichfuldicht die my ongherechtelijck haten. | |
20[21]Die quade dinghen voor goede loonen lasterden my, want ick volchde die goetheyt. | |
21[22]En verlaet my niet Heere mijn God, en gaet niet wech van my. | |
22[23]Denct op mijnder helpen, Heere Godt mijnder salicheyt. |
|