Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxxvi. Psalm.

Noli emulari.

1

EN wilt niet volghen die quaetwillighe, noch en weest niet ialours sijn op die ghene die boosheyt doen.

2

Want ghelijck gras sullen sij haestelijck verdorren, ende ghelijck groen spijscruyt sullen sij ter stont nederuallen.

3

Hoept inden Heere ende doet goetheyt, ende woont op die aerde, ende ghy sult gheuoedt worden in haer rijckheyden.

4

Hebt ghenoechte inden Heere, ende hy sal v gheuen die begheerten uwer herten.

5

Openbaert den Heere uwen wech, ende hoept in hem, ende hy salt doen.

6

Ende hi sal v rechtuerdicheyt wtbrenghen als licht, ende v ordeel als den middach,

7

weest den Heere onderdanich, ende bidt hem.

En wilt niet nauolghen den ghenen die voorspoedich is in sijnen wech, den mensch die onrechtuerdicheyt doet.

8

Houdt op van der gramscappen, ende verlaet die rasende toornicheyt, en wilt niet volghen dat ghy quaet doen soudt.

9

Want die quaetwillich sijn sullen verdreuen worden, maer die den Heere verdraghen, dese sullen die eerde beeruen.

10

Ende noch een luttelken tijts, ende die sondaer en sal niet sijn, ende ghi sult sijn plaetse soecken ende niet vinden.

11

Maer die saechtmoedighe sullen die eerde beeruen, ende sij sullen ghenoechte hebben in die menichfuldicheyt des vreedts.

12

Die sondaer sal gade slaen den rechtuerdighen, ende crijselen op hem met sijnen tanden.

13

Maer die Heere sal hem bespotten, want hy siet van verre dat sijnen dach comen sal.

14

Die sondaren hebben tsweert wter sceyden ghetrocken, sij hebben ghespannen haren boghe.

Om dat sij bedrieghen souden den armen, ende den behoeuighen dat sij dooden souden die oprechte van herten.

15

Hen sweert gae binnen in hen selfs herte, ende haren boghe werde ghebroken.

16

Een weynich is beter den rechuerdighen, bouen veel rijckdommen der sondaren.

17

Want die armen der sondaren sullen ghebroken worden, maer die Heere versterct die rechtuerdighe.

18

Die Heere weet die daghen van die ombesmette, ende hen erffenisse sal inder eewicheyt sijn.

19

Sij en sullen niet bescaemt worden inden quaden tijt, ende in die daghen des honghers sullen sij versaet worden, want die sondaers sullen vergaen.

20

Maer die vianden des Heeren ter stont als sij gheeert sullen sijn, ende verheuen, soo sullen sij verghaende ghelijck roock vergaen.

21

Die sondaer sal ontleenen, ende niet betalen, maer die rechtuerdighe is bermhertich ende sal gheuen.

22

Want die hem ghebenedijden sullen die eerde beeruen, maer die hem vermalendijden sullen vergaen.

23

By den Heere sal den ganck vanden mensch terecht bescict worden, ende sijnen wech sal hy willen.

24

Als hy valt soo en sal hy niet ghequetst worden, want die Heere leght sijn hant daer onder.

25

Ick heb ionck gheweest ende nv ben ick oudt gheworden, ende ick en heb niet ghesien den rechtuerdighen verlaten, noch sijn saet broot soeckende.

26

Alle den dach soo doet hy bermherticheyt ende leent, ende sijn saet sal in ghebenedijdinghe sijn.

27

Wijct van tquaet ende doet goet, ende blijft daer in eewelijck ende emmermeer.

28

Want die Heere bemint dat ordeel, ende hy en sal sijn heylighen niet verlaten, inder eewicheyt sullen sij bewaert worden.

Die onrechtuerdighe sullen ghepijnt worden, ende tsaet vanden ongoddelijcken sal vergaen.

29

Maer die rechtuerdighe sullen die eerde beeruen, ende sullen op haer woonen eewelijck ende emmermeer.

30

Den mont vanden rechtuerdighen sal wijsheyt bedencken, ende sijn tonghe sal ordeel spreken.

31

Die wet sijns Godts is in sijn herte, ende sijn ganghen en sullen niet omghestooten worden.

32

Die sondaer aenmerct den rechtuerdighen, ende hy soect hem te dooden.

33

Maer die Heere en sal hem niet verlaten in sijn handen, noch hy en sal hem niet verdoemen als hy gheordeelt sal worden.

34

Verbeydt den Heere ende bewaert sijnen wech, ende hy sal v verheffen dat ghy erffelijck moecht die eerde ontfanghen, als die sondaers sullen verghaen, dan suldijt sien.

35

Ick heb den ongoddelijcken ghesien verheuen, ende opgheuoert ghelijck die cederboomen van Libanus.

36

Ende ick ghinck voorby ende siet hy en was niet, ende ick heb hem gesocht, ende sijn plaetse en is niet gheuonden.

37

Bewaert die onnooselheyt, ende siet die rechtuerdicheyt, want het sijn die bleuelinghen den vreedtsamighen mensche.

38

Maer die onrechtuerdighe sullen te samen vergaen, die bleuelinghen der ongoddelijcker sullen vernielt worden.

39

Maer die salicheyt van die rechtuerdighe is vanden Heere, ende hy is hen bescermer inden tijt der tribulacien.

40

Ende die Heere salse helpen ende hen verlossen, ende hy salse wttrecken vanden sondaers ende hy salse behouden,

[p. *455]

want sij hebben in hem ghehoopt.