Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]SAlich is die man die hem verstaet op den behoeuighen ende den armen, inden quaden dach sal hem die Heere verlossen. | |
2[3]Die Heere bewaere hem, ende make hem leuende, ende hy make hem salick op die eerde, ende hy en leuere hem niet inden wille van sijnen vianden. | |
3[4]Die Heere come hem ter helpen op dat bedde van sijnder pijnen, alle sijn rustplaetse hebdi omghekeert in zijn cranckheyt. | |
4[5]Ick heb gheseyt Heere ontfermt v mijnder, gheneest mijn ziele, want ick heb v misdaen. | |
5[6]Mijn vianden hebben my quaet gheseyt, wanneer sal hy steruen ende wanneer sal zijnen naem vergaen? | |
6[7]Ende al wandelde hy om te sien, soo sprack hy ydelheden, zijn herte heeft boosheyt vergadert voer sij seluen. Hy ginck buyten wt, ende sprack tsamen van dat selue. | |
7[8]Teghen my hebben alle mijn vianden heymelijcke spraeck ghehadt, teghen my hebben sij my quaet ghedacht. | |
8[9]Een onrecht woert hebben sij teghen my ghestelt, meyndi dat hy die slaept daer toe niet doen en sal om op te staen? | |
9[10]Want die mensch mijns vreedts daer ick in ghehoept hebbe, die mijn brooden adt, heeft my grootelijck onder die voeten ghetreden. | |
10[11]Maer ghy Heere ontfermt v mijnder, ende verwect my, ende ick salt hen weder loonen. | |
11[12]Daer aen heb ic bekent dat ghy my ghewilt hebt, want mijn viant en sal hem niet verblijden ouer my. | |
12[13]Maer my hebdi om die onnooselheyt ontfanghen ende ghy hebt my vast ghemaect in v aensicht inder eewicheyt. | |
13[14]Ghebenedijt is die Heere Godt van Israel vander eewicheyt tot die euwe der eewen, dat ghesciede, dat ghesciede. |
|