Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxxij. Psalm.

Exultate iusti.

1

UErhuecht v ghy rechtuerdighe inden Heere, den rechten betaemt die louinghe.

2

Belijdet den Heere metter herpen, metten Psalter van thien snaren soo singhet hem.

3

Singht hem een nieuwe sanck liet, singhet hem wel met luyder stemmen.

4

Want recht is dat woort des Heeren, ende alle sijn wercken sijn in trouwe.

5

Hy bemint die bermherticheyt ende doordeel, van des Heeren bermherticheyt is die eerde vol.

6

Door des Heeren woort sijn die hemelen vast ghemaect, ende door den gheest sijns monts allen hen cracht.

7

Verghaderende als in een flessche die wateren der zee, stellende in sijn schatten die afgronden.

8

Alle die eerde vreese den Heere, ende van hem moeten beroert worden alle die opt eertrijck woonen.

9

Want hy heuet gheseyt, ende sij sijn ghemaect, hy heuet gheboden, ende sij sijn ghescapen.

10

Die Heere verstroyt die raden der Heydenen, ende hy wederleyt die ghedachten der volcken, ende hy wederleydt die raden der princen.

11

Maer den raet des Heeren blijft inder eewicheyt die ghedachten sijns herten blijuen van gheslachte tot gheslachte.

12

Salich is dat volck wiens Godt die Heere is, dat volck dwelck hy vercoren heeft tot een erffenisse voor sij seluen.

13

Vanden hemel heeft die Heere neder ghesien, hy heeft ghesien alle die kinderen der menschen.

14

Van sijnder bereyder wooninghen heeft hy neder ghesien ouer alle die op aertrijck woonen.

15

Die elcken besonder hen herten ghemaect heeft, die allen hen wercken verstaet.

16

Die coninck en wordt niet behouden door groote cracht, ende een ruese en sal niet behouden worden door die menichfuldicheyt van sijnder cracht.

17

Bedrieghelijck is tpeert ter salicheyt, ende in die oueruloedicheyt van sijnder macht en salt niet behouden worden.

18

Siet die ooghen des Heeren sijn ouer den ghenen die hem vreesen, ende op die ghene die hopen op sijn bermherticheyt.

19

Dat hy hen zielen vander doot verlosse, ende hen voedde inden hongher

20

Onse ziele verbeyt den Heere, want hy is ons helper, ende onse bescermer.

21

Want in hem sal ons herte verblijden, ende in sijnen heylighen naem hebben wij ghehoept.

22

Laet v bermherticheyt Heere ghescieden ouer ons, ghelijck wij op v ghehoept hebben.