Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxxi. Psalm.

Beati quorum remisse.

1

SAlich sijn sij der welcker boosheden vergheuen sijn, ende der welcker sonden bedect sijn.

2

Salich is die man den welcken die Heere die sonde niet toegherekent en heeft, ende in wiens gheest gheen bedroch en is.

3

Om dat ick ghesweghen hebbe soo sijn mijn beenderen veroudert, als ick riep den gheheelen dach.

4

Want dach ende nacht is v hant op mi verswaert, ick ben omghekeert in mijn allendicheyt te wijle dat het rugghe been doorsteken wort.

5

Mijn misdaet heb ick v te kennen ghegheuen, ende mijn onrechtuerdicheyt en heb ick niet verborghen.

Ick heb gheseydt ick sal teghen my mijn onrechtuerdicheyt den Heere belijden, ende ghy hebt vergheuen die boosheyt mijnder sonden.

6

Hiervoor sal een ieghelijc heylighe bidden, ten bequamen tijde.

Maer nochtans inden oueruloet van veel wateren, en sullen sij tot hem niet gheraken.

7

Ghy sijt mijn toeulucht van die quellinghe die my omuanghen heeft, mijn verhueghen, verlost my vanden ghenen die my omringt hebben.

8

Ick sal v verstant gheuen, ende ick sal v onderwijsen in desen wech daer door ghy gaen sult, ick sal mijn ooghen op v vast houden.

9

En wilt niet worden ghelijck een peert oft eenen muyl, die welcke gheen verstant en hebben.

Met den binseel ende thoom so bedwinghet hen kinnebacken die tot by v niet en comen.

10

Veel sijn die gheesselen des sondaers, maer hem die inden Heere hoept, sal die bermhertich omuanghen.

11

Verblijdt v inden Heere ende verhuecht v ghi rechtuerdighe, ende glorieert alle die oprecht van herten sijt.