Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxv. Psalm.

Iudica me Domine.

1

OOrdeelt my Heere, want ick heb in mijn onnooselheyt ghewandelt, ende inden Heere hopende en sal ick niet cranck worden.

2

Proeft my Heere, ende ondersoect my, brandt mijn nieren ende mijn herte.

3

Want v bermherticheyt is voor mijn ooghen, ende ick heb een behaghen ghehadt in v waerheyt.

4

Ick en heb niet gheseten metten raet der ydelheyt, ende metten ghenen die onrechte wercken doen en sal ick niet ingaen.

5

Ick heb ghehaet die vergaderinghe der quaetwilligher, ende metten ongoddelijcken en sal ick niet sitten.

6

Ick sal onder die onnoosele mijn handen wasschen, ende ick sal uwen outaer omgaen Heere.

7

Op dat ick hooren mach die stemme des loofs, ende vertellen alle uwe wonderlijcheden.

8

Heere ick heb bemint die cierlijcheyt ws huys, ende die plaetse der wooninghen van uwer glorien.

9

En verdoet metten ongoddelijcken o Godt mijn ziele niet, ende metten bloetdorstighe mannen mijn leuen.

10

In der welcker handen boosheden sijn, hen rechte handt is gheuult met ghiften.

11

Maer ick heb in mijn onnooselheyt ghewandelt, verlost my ende ontfermt v mijnder.

12

Mijnen voet heeft ghestaen opden rechten wech, in die kercken sal ick v Heere ghebenedijden.