Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xxiiij. Psalm.

Ad te domine leuaui.

1

TOt v Heere heb ick mijn ziele opgheauen,

2

mijn Godt in v heb ick betrouwen, ic en sal niet bescaemt worden.

3

Noch en laet mijn vianden my niet bespotten, want alle die v verbeyden en sullen niet bescaemt worden.

4

Laetse bescaemt worden alle die onrechtuerdicheden doen te vergheefs.

Thoont my Heere v weghen, ende leert my v paden.

5

Bescict my in v waerheyt, ende leert my, want ghy sijt Godt mijn salichmaker, ende v heb ic verbeydt den gheheelen dach.

6

Weest ghedachtich uwer bermhertigher wercken Heere, ende uwer bermherticheden die vanden beghin der werelt gheweest sijn.

7

Die versuemenissen mijnder ioncheyt, ende mijnder onwetenheden en wilt niet ghedencken.

Nae v bermherticheden weest ghy mijns ghedachtich, om uwer goetheyt Heere.

8

Suet ende recht is die Heere, daerom sal hy een wet gheuen den ghenen die inden wech misdoen.

9

Hy sal die saechtmoedighe beschicken int ordeel, hy sal die goedertieren sijn weghen leeren.

10

Alle die weghen des Heeren sijn bermherticheyt ende warachticheyt, den ghenen die sijn verbont ende sijn ghetuyghenissen soecken.

11

Om uwen naem Heere suldi ghenadich wesen mijnder sonde, want sij is vele.

12

Wie is die mensch die den Heere vreest? een wet heeft hy hem gestelt inden wech die hy ghecosen heeft.

13

Sijn ziele sal in goede dinghen woonen, ende sijn saet sal die eerde eruen.

14

Die Heere is een vasticheyt den ghenen die hem vreesen, ende sijn verbont dattet hen soude openbaer worden.

15

Mijn ooghen sijn altijts totten Heere, want hy sal wten stricke mijn voeten trecken.

16

Siet op my ende ontfermt v mijnder, want ick ben eenich ende arm.

17

Die tribulacien mijns herten sijn vermenichfuldicht, van mijnen nooden verlost my.

18

Aensiet mijn vernederinghe ende arbeyt, ende vergeeft alle mijn misdaden.

19

Aensiet mijn vianden, want sij sijn vermenichfuldicht, ende met eenen ongherechtighen haet haten sij my.

20

Bewaert mijn ziele, ende verlost my, ic en sal niet bescaemt sijn, want ick in v ghehoept hebbe.

21

Die onnoosele ende gherechtighe hebben my aenghehanghen, om dat ick v verbeyde.

22

Verlostse o God van Israel wt alle hen tribulacien.