Den gheheelen Bybel, Inhoudende het oude ende nieuwe Testament (Leuvense bijbel 1548)



Den .xiij. Psalm. Dixit insipiens in corde.
1 DIe onwijse heeft gheseyt in sijn herte, daer en is gheen God, sij sijn verdoruen ende afgrijselijc gheworden in hen beneersten, daer en is niement die goet doet, daer en is niemant tot eenen toe.
2 Die Heere heeft wtghesien op die kinderen der menschen, om dat hy sien soude ofter oock iemant is verstaende, ende Godt soeckende.
3 Sij sijn alle besijden afgheweken, sij sijn te samen onnut gheworden, daer en is niemant die goet doet, daer en is niemant tot eenen toe. Een open graf is hen kele, met haren tonghen deden sij bedrieghelijck, der aderen fenijn is onder hen tonghe. Der welcker mont is vol maledictien ende bitterheyts, rasch sijn hen voeten om bloet wt te storten. Volcomen bederffenisse ende onsalicheyt is in hen weghen, ende den wech des vreedts en hebben si niet gekent, daer en is gheen vreese Gods voor hen ooghen.
4 En sullen sijt alle niet bekennen die boosheyt doen, die mijn volck verslinden als die spijse des broots?
5 Den Heere en hebben sij niet aenroepen, sij hebben daer ghebeeft van vreesen, daer gheen vreese en was.
6 Want die Heere is in dat rechtuerdich geslachte, den raet vanden armen hebt ghy bescaemt, want die Heere is sijn hope.
7 Wie sal wt Sion gheuen die salicheyt Israhel? als die Heere afghekeert sal hebben die gheuangenisse sijns volcs, soo sal hem Iacob verhueghen, ende Israel hem verblijden.