Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xij. Psalm.

Vsquequo Domine.

1

HOe langhe suldi mijns vergheten Heere toteynde? hoe langhe keerdi v aensicht van my?

2

Hoe langhe sal ick raden stellen in mijn ziele, pijne in mijn herte des daechs?

3

Hoe langhe sal mijn viant verhauen worden bouen my?

4

siet aen ende verhoort my Heere mijn Godt.

Verlicht mijn ooghen dat ick tot gheenen tijde en ontslape in die doot?

5

dat mijn viant nemmermeer en segghe. Ick heb hem verwonnen.

Die my quellen, sullen hen verhueghen eest dat ick beroert worde,

6

maer ick heb in v bermherticheyt ghehoept.

Mijn herte heeft hem verhuecht in sijnen salichmakere, ick sal den Heere singhen die my goede dinghen ghegheuen heeft, ende ick sal met sanghe louen den naem vanden alderhoochsten Heere.