Den gheheelen Bybel, Inhoudende het oude ende nieuwe Testament (Leuvense bijbel 1548)



Den .xiiij. Psalm. Domine quis habitabit
1 HEere wie sal in v tabernakel woonen? oft wie sal rusten op uwen heylichen berch?
2 Die sonder smette wandelt, ende werct rechtuerdicheyt.
3 Die de waerheyt spreect in sijn herte, die gheen bedroch ghedaen en heeft met sijn tonghe. Noch sijnen naesten gheen quaet en heeft ghedaen, noch gheen verwijt ghenomen en heeft teghen sijnen naesten.
4 Die quaetwillighe is voor sijn aensicht te niet ghebracht, maer die den Heere vreesen die glorificeert hy. Die sijnen naesten sweert ende niet en bedriecht,
5 die sijn ghelt niet ghegheuen en heeft ten woecker, ende gheen ghiften ouer den onnooselen ontfanghen en heeft. Die dese dinghen doet, en sal niet beroert worden inder eewicheyt.