Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺KEndi oock den tijt van der baert der wilder gheyten, oft hebdi die barende hinden ghemerct?

+ A

2

Hebdi die maenden ghetelt van haren ontfanck, ende hebdi den tijt van haerder baert gheweten?

3

Sy worden gheboocht tot de ionghen, ende sij baren, ende laten wt groote steninghen.

4

Haer kinderen worden ghesceyden ende gaen ter weyden, sij gaen wt, ende en comen niet wederom tot haer.

5

Wie heeft den wilden ezel vrij ghelaten, ende wie heeft sijn banden ontbonden?

6

Dien ick in die woestijne een huys ghegheuen hebbe, ende sijn tabernakelen in een pekelsout landt.

7

Hy versmaet die menichte der stadt, den roep vanden drijuer en hoort hy niet.

8

Hy siet al omme die berghen van sijnder weyden, ende alderhande groyende cruyden ondersoect hy.

9

Sal den eenhoren v willen dienen, oft sal hy woonen aen v cribbe?

[p. *441]

10

Suldi den eenhooren binden met uwen strenghen om te ackeren, oft sal hy die cluyten der vallyen breken achter v?

11

Suldi oock betrouwen hebben op sijn groote stercheyt, ende suldi hem v arbeyden laten?

12

Suldi hem betrouwen dat hy v graen gheuen sal, ende dat hy uwen dorschvloer sal vergaderen?

13

Die vederen vanden struys sijn ghelijck die vederen vanden valck, ende vanden hauick.

14

Als sij haer eyeren in deerde laetet, dan sulde ghy bijauontueren die verwermen int sandt?

15

Sij vergheet dat den voet die vertreedt, oft dat die beeste des velts die in stucken breket.

16

⁺Sy wordt verhart tot haer kinderen als oft die haer niet en waren, sij heeft te vergheefs ghewracht doen sij van gheen vreese ghedwonghen en was.

+ C

17

Want Godt heeft haer van wijsheden berooft, noch hy en heeft haer gheen verstant ghegheuen,

18

Alst tijt es soe heeft sij haer vloghelen om hooghe, sij bespot dat peert, ende den rijdere van dien.

19

Suldi den peerde stercheyt gheuen, oft suldi om sijnen halse tgheney doen?

20

Suldi dat opwecken als sprinchanen? die glorie van sijnen noesgaten es veruaerlijcheyt.

21

Het graeft die aerde metten clau, het sprinct op stoutelijck, het gaet die ghewapende te ghemoet

22

Tversmaedt die vreese noch ten wijct niet voert tsweert.

23

Op hem sal den pijlkoker luyden, ende beroert worden spiesse ende schilt.

24

Hittich ende grimmende verslindet daerde, noch ten acht niet dat het gheclanck des trompets gheluyt gheeft.

25

Alst dat trompet hoort, soe spreket Vah, ende het riect den strijt van verre, tvermanen vanden capeteynen, ende tghehuyl des heyrs.

26

⁺Crijcht den hauick doer v wijsheyt oock pluymen wtstreckende sijn vloeghelen naet suyden?

+ D

27

Sal den aren tot uwen ghebode opghehauen worden, ende sijnen nest in hooghe plaetse stellen?

28

Op die steen rootsen blijft hy, ende op die steyghe clippen woont hy, ende op die rootsen daermen niet aen comen en can.

29

Van daer aensiet hy sijn aes, ende sijn ooghen sie van verre.

30

Sijn ionghen sullen bloet lecken, ende waer een doot lichaem is dae is hy ter stont.

31

Ende die Heere heeft daer noch toe gheseyt, ende heeft ghesproken tot Iob.

32

Soo wie met Godt kijft, sal hy soo lichtelijck rusten? Certeyn soe wie Godt straeft, die moet hem antwoerden.

33

Ende Iob antwoerdende den Heere heeft gheseyt,

34

Die lichtelijck ghesproken hebbe wat mach ick antwoerden? mijn hant sal ick op mijnen mont legghen.

35

Een dinck heb ick ghesproken, Het welck och oft ict niet gheseyt en hadde, ende een andere, totten welcken ick voerts niet meer doen en sal.