Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xl. Capittel.

1

⁺ENde die Heere antwoerdende tot Iob doer een ghedruyssche heeft gheseyt,

+ A

2

Gordt toe v lendenen als een man. Ick sal v vraghen, segghet my.

3

Suldi mijn ordeel te niet doen, ende my verdoemen, op dat ghy moecht gherechtueerdicht sijn?

4

Ende al hebdi eenen arm ghelijck Godt, ende al dondert ghy met een stemme als hy doet.

5

Omhanghet v met schoonheyt, ende wort verheuen om hooghe, ende weest glorioes, ende doet schoon cleederen aen.

6

Verstroyt die hoouaerdighe in v verbolghenheyt, ende aensiende alle vermetelijcke verootmoedichtse.

7

Aensiet alle die hoouaerdighe ende bescaemtpse, ende vernielt die ongoddelijcke in hen plaetse.

8

Berchtse int stoff te samen, ende hen aensicht verdrinct in die grachte.

9

Ende ick sal belijden dat v rechter hant v sal moghen behouden.

10

⁺Siet Behemoth den welcken ick met v ghemaect hebbe, die sal hoy als eenen osse eten.

+ B

11

Sijn stercheyt is in sijn lendenen, ende sijn cracht is inden nauel sijns buycs.

12

Hy swinght sijnen steert ghelijck eenen cederboom, die zenuen sijnder manlijcheden sijn verwerret.

13

Sijn beenderen sijn als metalen pijpen, sijn morwe ghebeente is ghelijck yseren platen.

14

Hy is dbeghinsel van Godts weghen, die hem ghemaect heeft, sal sijn sweert aen voeghen.

15

Voer desen draghen die berghen cruyden, alle die beesten des velts sullen daer spelen.

16

⁺Onder die scaduwe slaept hy in die heymelijcke plaetsen des riets, ende in vochtighe plaetsen.

+ C

17

Die scaduwen bedecken sijn scaduwe, hem sullen omringhen die wilghen der beken.

18

Siet hy sal den vloet opsuypen, ende hem niet verwonderen, ende hy heeft betrouwen dat die Iordane in sijnen mont vloeden sal.

19

In sijn ooghen als met eenen vischaeck sal hy hem vanghen, ende met priemen sal hy sijn noesgaten doersteken.

20

Moechdi Leuiathan wt trecken met eenen vischhaeck, ende suldi met een seel sijn tonghe binden?

21

⁺Suldi eenen rinck in sijn noesgaten stellen, oft met eenen armrinck sijn kake doersteken.

+ D

22

Sal hy tot v ghebeden menichfuldighen, oft sal hy v sachte woerden spreken?

23

Sal hy met v een verbont maken ende suldi hem ontfanghen als eenen eewighen knecht?

24

Suldi hem bedrieghen als eenen voghel, oft suldi hem binden met uwen dienst vrouwen?

25

Sullen hem die vrienden in stucken houwen, ende sullen hem die coopluyden deylen?

26

Suldi die vischnetten met sijnen velle vullen, ende eenen vischcorf met sijnen hoofde?

27

Legt op hem v hant, ghedenct der orloghen, ende en spreect voerts niet meer.

28

Siet sijn hope sal hem faelgeren, ende daer sijt alle sien sullen, sal hy van bouen neder gheworpen worden.