Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺ENde die Heere antwoerdende Iob in eenen storm heeft gheseyt,

+ A

2

Wie is dese, omwindende die sentencien met ongheleerde woerden?

3

Gordet v lendenen toe als een man ick sal v vraghen, ende antwoert my.

4

Waer waerdi doen ick die fundamenten der eerden leyde? gheeft my dat te kennen hebdi verstant.

5

Wie heeft die maten van haer ghestelt eest dat ghijt weet? oft wie heeft op haer een recht snoer wtghetrocken?

6

Waer op sijn haer stoensels vast ghemaect? oft wie heeft haren hoecsten nederghelaten.

7

Doen my die morghenstonts sterren te samen loefden, ende alle Godts kinderen iolijt maecten?

8

Wie heeft die zee met dooren besloten, doen die wtborste als wt der moeder voertcomende.

9

Doen ick die wolcke stelde tot haer cleedt, ende met eenen donckeren neuel die omwont als met kints doecken?

10

Ick heb die omringhet met mijnen palen, ende ick heb die grendel ende doeren ghestelt.

11

Ende ick heb gheseyt, Tot hier toe suldi comen, ende ghy en sult niet voorder gaen, ende hier suldi breken v opheffende baren.

12

⁺Hebdi nae v gheboerte den morghenstont gheboden, ende der dagheraet haer plaetse ghewesen?

+ B

13

Ende hebdi tsamen stootende ghehouden die wterste der aerden, ende die ongoddelijcke daer wt gheslaghen?

14

Den seghel sal wederom ghestelt worden als slijck, ende hy sal staen als een cleedt.

15

Vanden ongoddelijcken sal hen licht ghenomen worden, ende den hooghen arm sal ghebroken worden.

16

Hebdi in die diepten der zee ghegaen ende hebdi ghewandelt in die wterste van den affgront?

17

Sijn v gheopent die poorten des doots, ende hebdi die duyster poorten ghesien?

18

Hebdi die breetheyt der aerden aenmerct? gheuet my te kennen, weet ghijt al.

19

In welcken wech dattet licht woont, ende welck der duysternissen plaetse is.

20

Op dat ghy een ieghelijck moecht leyden tot sijn palen, ende verstaen moecht die paden van sijnen huyse.

21

Wiste ghy doen dat ghy soudt gheboren worden? ende kendet ghy tghetal van uwen daghen?

22

Sijde ghy ghegaen in die scatten vanden sneu, oft hebdi die scatten vanden haghel ghesien?

23

Die ick bereydt hebbe tot den tijt des viants, totten dach des strijdts ende der orloghen?

24

Doer welcken wech wort dat licht ghespraeyt, die hitte bedeylt op die eerde?

25

⁺Wie heeft den aldercrachtichsten slachreghen loop ghegheuen, ende den wech vanden luydenden donder.

+ C

26

Dat opt die aerde reghenen soude, sonder mensch in die woestijne, daer niemant der menschen en woont.

27

Om dat hy veruullen soude die plaetse die sonder wech was, ende verlaten, ende voertbrenghen soude groeyende cruyden?

28

Wie is des reghens vader? oft wie heeft ghebaert die druppelen des dauws.

29

Wt wiens buyck is dat ys comen? ende wie heeft den vorst vanden hemel ghebaert?

30

In die ghelijckenisse van steenen worden die wateren hart, ende dat ouerste vanden affgront wort verstijft.

31

Suldi te samen moghen voeghen die blinckende pleyadas sterren, oft moechdi den omlop van die arcturus sterren verstroyen?

32

Brengde ghy die morghen sterre voerts te sijnen tijde, ende doede ghy die auont sterre op die kinderen der eerden opgaen?

33

Kende ghy die ordinancie des hemels ende suldi haer redene in die aerde stellen?

34

⁺Suldi inden neuel v stemme verheffen, ende sal dat ghedruysch der wateren v ouerdecken?

+ D

35

Suldi die blixemen wtsenden dat sij gaen sullen, ende sullen sij wederom comende v segghen. Wy sijn hier?

36

Wie heeft in des menschen binnensten die wijsheyt ghestelt? oft wie heeft den haen verstant ghegheuen?

37

Wie sal der hemelen redene wtspreken, ende wie sal doen slapen den eendrachtighen sanck des hemels?

38

Wanneer worde tstoff op die aerde ghestort, ende wanneer worden die cluyten tsamen ghevoecht?

39

Suldi der leeuwinnen haren roof ontnemen, ende die ziele van haren ionghen welpens veruullen.

40

Als sij rusten in die holen, ende listen legghen in die speluncken?

41

Wie bereydt der rauen haer aes als haer ionghen tot Godt roepen, al omloopende om dat sij gheen aes en hebben?