Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺ENde Eliu daer noch toe doende, heeft dese woerden ghesproken.

+ A

2

Verdraecht my noch een luttelken, ende ick salt v te kennen gheuen. Want ick hebbe noch dat ick voer Godt spreken sal.

3

Ick sal mijn wetenheyt verhalen vant beghinsel, ende mijnen scepper sal ick rechtuerdich bewijsen.

4

Want mijn woerden sijn warachtich ende sonder loghene, ende die volmaecte wetenheyt sal voer v ghetoont worden.

5

Godt en verworpt die machtighe niet want hy selue machtich is.

6

Maer hy en behoudt die ongoddelijcke niet, ende recht ordeel gheeft hy den armen.

7

Hy en sal vanden rechtuerdighen sijn ooghen niet wechnemen, ende die coninghen stelt hy in den rechter stoel inder eewicheyt, ende aldaer worden sij opghericht.

8

Ende al waren sij in ketenen, ende dat sij ghebonden waren met die zeelen der armoeden.

9

⁺Soo sal hy hen te kennen gheuen hen wercken, ende hen groote misdaden, om dat sij met ghewelt verdruckende sijn gheweest.

+ B

10

Ende hy sal oock hen oore openen om dat hijse straffen soude, ende hy sal spreken, dat sij weder om keeren souden van die boosheyt.

11

Eest dat sijt hooren ende onderhouden, soo sullen sij hen daghen volbringhen int goede, ende hen iaren in glorien.

12

Maer eest dat sijt niet en hooren, soo sullen sij doert sweert gaen, ende sullen vernielt worden in dwaesheden.

13

Die gheveynsde ende loose verwecken die gramscap Godts, ende sij en sullen niet roepen als sij sullen ghebonden zijn.

14

Hen ziele sal steruen int tempeest, ende hen leuen sal sijn onder die wijfachtighe mans.

15

Hij sal den armen verlossen van sijn benautheyt, ende hy sal in die tribulacie sijn oore open doen.

16

Daer om sal hy v behouden seer mildelijck, vanden enghen mont, ende die gheen fundament onder hem en heeft, ⁺maer die ruste uwer tafelen sal vol vetticheyts sijn.

+ C

17

V sake is gheordeelt als eens ongoddelijcs menschs, die sake ende doordeel suldi ontfanghen.

18

Daer om soo en laet v van die gramscap niet verwinnen dat ghy iemant soudt verdrucken, noch die menichte der ghiften en buyghe v niet.

19

Legghet neder v grootheyt sonder tribulacie, ende alle die vrome van stercheyt.

20

En verlengt den nacht niet dat die volcken voer haer op climmen moghen.

21

Wacht v dat ghy niet aff en wijct ter boosheyt, want dese hebdi begonst te volghen nae die allendicheyt.

22

Siet Godt is hooghe in zijn stercheyt, ende niemant en is sijns ghelijck in die wetgheuers.

23

Wie sal moghen ondersoecken zijn weghen? oft wie soude hem moghen segghen, Ghy hebt onrechtuerdicheyt ghedaen?

24

⁺Ghedenct dat ghy zijn werck niet en weet, daer die mannen aff ghesongen hebben.

+ D

25

Alle die menschen sien hem, een ieghelijck siet van verre.

26

Siet Godt is groot te bouen gaende onse wetenheyt, tghetal van sijnen iaren en is niet om rekenen.

27

Die wech neemt die druppelen des reghens, ende stort die slachreghenen ghelijck stroomen,

28

die vanden wolcken vlieten diet al ouerdecken van bouen.

29

Eest dat hy die wolcken wilt wtstrecken ghelijck zijn tente.

30

Ende blixemen met zijnen licht van bouen, soo sal hy oock die herren der zee ouerdecken.

31

Want hier door ordeelt hy die luyden, ende gheeft spijse veel menscen.

32

In zijn handen verbercht hi dlicht, ende beueelt dat wederom aen comen soude.

33

Hy vercondicht daer aff sijnen vrient, dattet zijn besittinghe is, ende dat hy daer toe soude moghen opclimmen.