Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺HIerom heeft Eliu dese woerden weder om ghesproken.

+ A

2

Dunct v dat v ghepeys rechtuerdich is, dat ghy segghen soudt. Ick ben rechtuerdigher dan Godt?

3

Want ghy hebt gheseyt, V en behaecht niet dat recht es, oft wat salt v baten, eest dat ick sondighe?

4

Hier om sal ick antwoerden uwen woerden, ende uwen vrienden met v.

5

Siet opwaerts den hemel, ende aensiet, ende aenscouwet den hemel dat hy hoogher is dan ghy.

6

Eest dat ghy sondicht wat suldi hem letten?

[p. *439]

ende eest dat v boosheden vermenichfuldicht worden, wat suldi teghen hem doen?

7

⁺Voerts ooc eest dat ghy rechtuerdelijck doet, wat suldi hem gheuen? oft wat sal hy van uwer hant ontfanghen?

+ C

8

Eenen mensch die ws ghelijck es dien sal uwe ongoddelijcheyt hinderen, ende den sone des menschen sal v rechtuerdicheyt helpen.

9

Om die menichte der valscher beclappers sullen sij roepen, ende sij sullen iammerlijck weenen om dat ghewelt van den arm der Tyrannen.

10

Ende hy en heeft niet gheseyt, Waer is God die my ghemaect heeft, die ghegheuen heeft die liedekens in den nacht?

11

⁺Die ons leert meer dan die beesten der aerden, ende die bouen die voghelen des hemels ons onderwijst.

+ D

12

Daer sullen sij roepen, ende hy en salse niet verhooren, om die houerdie der quader.

13

Daer om en sal Godt niet te vergheefs hooren, ende die almachtighe sal die saken van een ieghelijcken aensien.

14

Ooc als ghijt segghen sult, soe en aenmerct hy dat niet, wordt gheordeelt voer hem, ende verwacht hem.

15

Want nu en brengt hy sijn verbolghentheyt niet toe, noch hy en wreect niet seere die groote misdaet.

16

Daer om opent Iob te vergheefs sijnen mont, ende sonder wetenheyt maect hy veel woerden.