Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ALdus Eliu voerts wtsprekende, heeft dit oock gheseyt,

+ A

2

Hoort ghy wijse mijn woerden, ende ghy gheleerde luystert nae my.

3

Want die oore proeft die woerden, ende die kele ondersceydt die spijsen.

4

Laet ons een ordeel kiesen, ende laet ons sien onder ons wat beter is.

5

Want Iob heeft gheseyt, Ic ben rechtuerdich, ende Godt verkeert mijn ordeel.

6

Want in my te ordeelen is loghene, ende mijnen scicht es gheweldich sonder eenighe sonde.

7

Wie isser een alsulcken man als Iob, die spotterie drinct ghelijck water.

8

Die gaet metten ghenen die boosheyt doen, ende wandelt met ongoddelijcke mannen?

9

Want hy heeft gheseyt, Een man en sal Gode niet behaghen, al liep hy oock met hem.

10

Daer om ghy ghehertighe mannen hoort my, Verre sij van Gode die boosheyt, ende vanden almachtighen die ongherechticheyt.

11

Want des menschen werck sal hy hem betalen, ende nae een ieghelijcs weghen sal hy hen wedergheuen.

12

Want voerwaer Godt en sal sonder sake niet verdoemen, noch die almachtighe en sal dat ordeel niet verkeeren.

13

Wien heeft hy anders op die aerde ghestelt? oft wien heeft hy ouer die werelt ghestelt die hy ghemaect heeft?

14

⁺Eest sake dat hy zijn herte tot hem scict, soo sal hi sijnen gheest, ende adem tot hem trecken.

+ B

15

Alle vleesch sal tsamen vergaen, ende die mensche sal in asschen wederkeeren.

16

Daer om hebdi verstant, soo hoort datter gheseyt wort, ende vaet die stemme mijnder spraken.

17

Sal die ghene diet recht vonnis niet en bemint moghen ghenesen worden? ende hoe verdoemde ghy hem soo seere die rechtuerdich is?

18

Die den coninck seyt ghy afftreder, die die vorsten noemt ongoddelijck?

19

Die der princen persoonen niet wt en neemt, noch die tyrannen niet ghekent en heeft, doen hy int recht streedt teghen den armen, want zijnder handen wercken zijn sij alle gader.

20

Ouersienlijck sullen sij steruen, ende ter middernacht sullen die volcken verstoort worden, ende sij sullen doergaen, ende den ghewelt doender sullen sij wechnemen sonder hant.

21

⁺Want sijn ooghen zijn opder menschen weghen, ende alle hen ganghen aenmerct hy.

+ C

22

Daer en sijn gheen duysternissen ende daer en is gheen scaduwe des doots, dat sij daer souden verborghen worden die boosheyt wercken.

23

Want ten is voerts niet meer in des menschen macht, dat hy tot Godt come int ordeel.

24

Hy salder veel ontellijcke vernielen, ende andere sal hy doen staen voer die.

25

Want hy weet hen wercken, ende daerom sal hy den nacht ouer brenghen, ende sij sullen heel in stucken ghebroken worden.

26

Als ongoddelijcke heeft hijse geslagen in die plaetse der sienders.

27

Die welcke van hem ghegaen zijn als van opsets wille, ende alle zijn weghen en hebben sij niet willen verstaen.

28

Dat sij tot hem souden doen comen dat gheroep vanden behoeuighen, ende dat hy hooren soude die stemme vanden armen.

29

Want als hy vrede verleent, wie isser die verdoemen sal? ende van dat hy sijn aensicht verborghen sal hebben wie isser die hem sal connen aenscouwen? ⁺ende ouer die Heydenen, ende ouer alle die menschen?

+ D

30

Die eenen gheueynsden mensche doet regneren om des volcs sonden.

31

Daer om want ick ghesproken hebbe tot Godt, soo en sal ict v oock niet verbieden.

32

Heb ick ghedoelt soe leert ghy my, hebbe ick boosheyt ghesproken, soo en sal ick voert daer niet meer toe doen.

33

Eyscht Godt die van v, om dat v die misnoecht heeft? want ghy hebt begonst te spreken, ende niet ick, weeti iet beters soe spreect.

34

Verstandighe mannen moeten my aenspreken, ende een wijs man hoore my.

35

Maer Iob heeft dwaselijck ghesproken, ende sijn woerden en luyden nae gheen ghestichticheyt.

36

Mijn vader laet Iob gheproeft worden totten eynde, en houdt niet op van den mensch der boosheyt.

37

Die tot sijnen sonden doet blasphemie, laet hem by middelen tijde tusschen ons benauwet worden, ende laet hem dan met sijnen woerden Godt ten rechte beroepen.