Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺ENde dese drij mannen hebben opghehouden van Iob te antwoerden, om dat hy hem liet duncken dat hy rechtuerdich was.

+ A

2

Ende Eliu die sone Barachel een Buziter van Rams gheslachte worde ghestoort ende verbolghen. Ende hy is gram gheworden teghen Iob, om dat hy seyde dat hi rechtuerdich was voer Godt.

3

Maer tseghen sijn vrienden is hy verbolghen gheweest, om dat sij gheen redelijcke antwoerde gheuonden en hadden, maer hadden Iob alleenlijc ghedoemt.

4

Hier om heeft Eliu Iob verbeyt doen hy sprack, om dat sij ouder waren die daer spraken.

5

Maer doen hy ghesien hadde dat die drije niet en hadden connen antwoerden, soe es hy seer gram gheworden.

6

⁺Ende Eliu die sone van Barachel die Buziter heeft gheseyt. Ic ben die ioncste van tijde, ende ghy lieden sijt oudere, daerom heb ic met nedergheboochden hoofde my ghescaemt mijnen sin te kennen te gheuen.

+ B

7

Want ick hoepte dat die laetste ouderdom spreken soude, ende dat die veelheyt der iaren wijsheyt soude leeren.

8

Maer soo ick sie, den gheest is in die menschen, ende dat inblasen des almachtighens gheest verstant.

9

Die langhe gheleeft hebben en sijn niet wijs, ende die ouders en verstaen dat recht niet.

10

Daer om sal ict segghen, hoort my, ick sal v lieden oock mijn wijsheyt toonen.

11

⁺Want ick hebbe uwe redenen verwacht, ick heb v wijsheyt ghehoort, soe langhe als ghy met redenen disputeerde.

+ C

12

Ende soo langhe als ic meynde dat ghi lieden wat seydt, soo mercte ict aen, maer soo ick sie daer en is niemant die Iob straffen can, ende van v lieden die Iobs redenen soude moghen antwoerden.

13

Dat ghy bijauontueren niet en segghet wy hebben die wijsheyt gheuonden. Godt heeft dien verworpen, ende niet die mensch.

14

Hy en heeft my niet aenghesproken, ende ick en sal hem niet antwoerden nae v lieden woerden.

15

Sy hebben seer ghevreest ende niet meer voerts gheantwoert, ⁺ende sij hebben van hen seluen die wtspraken benomen.

+ D

16

Want ick dan verbeyt hebbe ende sij en hebben niet ghesproken, sij hebben ghestaen, ende en hebben niet meer gheantwoert.

17

Soo sal ic mijn deel ooc antwoerden, ende mijn wijsheyt toonen.

18

Want ic ben vol woorden, ende den gheest mijns buycs benaut my.

19

Siet mijnen buyck is ghelijck den most sonder lochtgat die nieuwe flesschen ontwee breect.

20

Ick sal spreken ende een luttel den adem verhalen, ick sal mijn lippen open doen ende antwoerden.

21

Ick en sal gheens mans persoon wtnemen, ende ick en sal Godt den mensche niet ghelijck maken.

22

Want ick en weet niet hoe langhe dat ic dueren sal, ende oft my nae een luttel tijts mijn scepper halen sal. xxx