Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺IIk heb een verbont ghemaect met mijnen ooghen, dat ick niet eens peylen en soude van eender maghet.

+ A

2

Want wat deel soude in my Godt van bouen hebben, ende wat erffenisse die almachtighe vanden hoochsten?

3

En behoort die verderffenisse niet toe den boosen, ende die vervreemtheyt den ghenen die onrechtuerdicheyt doen?

4

En aenmerct hy my weghen niet, ende en telt hy allen mijn ganghen niet?

5

Heb ick in ydelheyt ghewandelt, ende heeft mijnen voet ghehaest int bedroch,

6

soe weghe hy my in een gherechtighe waghe, ende Godt wete mijn simpelheyt.

7

Heeft mijnen ganck vanden wech gheweken, ende heeft mijn ooghe mijn herte gheuolcht, ende heeft in mijnen handen enighe smette aenghecleeft.

8

Soe moet ick sayen, ende een ander ete dat, ⁺ende mijn afcoemste worde wtghewortelt.

+ B

9

Es mijn herte bedroghen gheweest op een vrouwe, ende heb ick aen mijns vrients doore laghen gheleyt.

10

Soe sij mijn wijf eens anders hoere, ende op haer moeten die vreemde ghebuycht worden.

11

Want dats ongheorloft ende die aldergrootste boosheyt.

12

Tes een vier totter verderffenisse toe verslindende, ende alle spruyten wtwortelende.

13

Heb ick versmaet int recht te staen met mijnen knecht, ende met mijn dienstwijf, als sij teghen my twistich waren.

14

Want wat sal ick doen als Godt sal opstaen om te ordeelen? ende als hy vraghen sal wat sal ick hem antwoerden?

15

En heeft hy my inden buyck niet ghemaect, die

[p. *437]

dien ooc ghemaect heeft, en heeft my die in die moeder alleen oock niet ghefigureert?

16

Heb ick den armen gheweyghert dat sij wilden, ende heb ick der weduwen ooghen doen beyden.

17

Heb ick mijnen bete alleen gheten, ende en heeft die weese daer niet af gheten?

18

(Want van mijnder kintscheyt soe is dat medelijden met my ghewassen, ende van mijns moeders lichaem is diet met my wtcomen)

19

Heb ick versmaet den gheenen die verghinck om dat hy gheen cleedt en hadde, ende den armen die sonder decsel was?

20

⁺En hebben sijn sijden my niet ghebenedijt, en is hy van mijnder scapen vellen niet verwermt gheweest?

+ C

21

Heb ick opden weesen mijn hant opghehauen, oock als ick my sach in die poorte douerhant hebbende?

22

Soe moet mijn scoudere vallen van haer voechsele, ende mijnen arm moet ghebroken worden met sijnen beenderen.

23

Want altijt heb ick Godt ghevreest als baren op my swillende, ende sijn swaricheyt en heb ick niet connen verdraghen.

24

Eest dat ick tgout voer mijn macht heb ghehouden, ende heb ick den fijnsten goude gheseyt. Mijn betrouwen?

25

Heb ick my verblijdt op mijn vele rijcdommen, ende om dat mijn hant vele gheuonden heeft?

26

Heb ick die sonne ghesien als sij scheen, ende die mane claerlijck voertgaende.

27

Ende heeft mijn herte hem verblijdt int heymelijck, ende heb ick mijn hant ghecust met mijnen mont.

28

Welck is die meeste boosheyt, ende een verloochenen teghen den alder hoochsten Godt?

29

Heb ick my verblijt van sijnen valle die my haette, ende heb ic my verhuecht om dat hem eenich quaet gheuonden hadde?

30

⁺Want ick en heb mijn kele niet ghegheuen om te sondighen, dat ick vervloeckende sijn ziele begheerde.

+ D

31

En hebben die mannen mijns tabernakels niet gheseyt. Wie mocht gheuen dat wy van sijnen vleesche mochten versaedt worden?

32

Buyten en is gheen pelgrim bleuen, mijn doere was voer den wandelaer open.

33

Heb ick als een mensch mijn sonde verborghen, ende heb ick in mijnen boesem mijn boosheyt bedect?

34

Heb ick veruaert gheweest voer een groote menichte, ende heeft die versmaetheyt van mijnen naesten my doen vreesen, ende dat ick niet meer ghesweghen en hebbe, ende wt die doore niet ghegaen?

35

Wie mocht my gheuen eenen hoorder, dat die almachtighe mijn begheerte mocht hooren, ende dat hi eenen boeck scrijue diet selue vonnist.

36

Dat ick dien op mijn scouder mocht draghen, ende dat ick dien om my doen mach als een croone?

37

Tot elcken voetstap mijns gancs sal ic hem vercondighen, ende als eenen prince sal ick dien offeren.

38

Eest dat mijn lant teghen my roept, ende dat haer voren met haer beweenen?

39

Heb ick die vruchten van haer gheten sonder ghelt, ende heb ick die ziele der ackerluijden ghequelt.

40

Soe moeten my voer tarwe distelen wassen, ende voer gherste dornen.

Hier sijn voleyndt die woerden Iob.