Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde Iob antwoerdende heeft gheseyt.

+ A

2

Nu is mijn redene oock in bitterheyt, ende die hant van mijnder plaghen is verswaert op mijn suchtinghe.

3

Wie sal my gheuen dat ick hem kenne ende vinde ende dat ick come tot sijnen rechterstoel.

4

Ick sal voer hem dat ordeel stellen, ende mijnen mont sal ick vullen met straffinghen.

5

Op dat ick weten mach die woerden die hy my antwoerde, ende dat ic verstaen mach wat hy my seyt.

6

Ic en wil niet dat hy met veel stercheyts met my dinghe, noch my en verdrucke met die swaerheyt van sijnder grootheyt.

7

Laet hem die rechtuaerdicheyt teghen my voerlegghen, ende mijn ordeel sal ter victorien comen.

8

Eest dat ick naden oosten gae, soo en sietmen hem

[p. *434]

niet, ga ick naden westen, soe en sal ick hem niet verstaen.

9

Gae ick ter slincker sijden, wat sal ick doen? ick en sal hem niet grijpen, eest dat ick my keere ter rechter sijden, soe en sal ick hem niet sien.

10

Maer hy weet mijnen wech, ende hi sal my proeuen alstgout dat voer tvier gaet.

11

Mijnen voet heeft sijn voetstappen gheuolcht, sijnen wech heb ick bewaert, ende ick en heb daer van niet besijden ghegaen.

12

Van die gheboden sijnder lippen en ben ick niet afgheweken, ⁺ende in mijnen schoodt heb ick gheberghen die woerden sijns monts.

+ D

13

Want hy is alleene, ende niemant en can afghekeeren sijn ghedachte, ende al dat sijn ziele ghewilt heeft, dat heeft sij ghedaen.

14

Ende als hy sijnen wille in mij sal volbrocht hebben, soo sijnder noch veel andere dinghen desghelijcs hem teghenwoerdich.

15

Ende daer om ben ick van sijnen aensicht verstoort, ende aenmerkende worde ick niet vreesen ghequelt.

16

Godt heeft mijn herte vermorwt, ende die almachtighe heeft my verstoort.

17

Want ick en ben niet vergaen om die aenstaende duysternissen, noch den duysteren neuel en heeft mijn aensicht niet bedect.