Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde Eliphas die Themaniter antwoerdende heeft gheseyt.

+ A

2

Mach een mensch by Gode gheleken worden, oock als hy is van volmaecter wetenheyt?

3

Wat batet Gode dat ghy rechtueerdich sijt? oft wat gheefdi hem, eest dat v leuen ombesmet is?

4

Sal hy vreesende v straffen, ende sal hy met v int recht comen.

5

Ende niet om v seer veel quaetheyt, ende v oneyndelijcke boosheden?

6

Want ghy hebt den pant van uwen broederen afghehaelt sonder sake, ende die naecte hebdi van cleederen berooft.

7

Gheen water en hebdi den vermoeydden ghegeuen, ende den hongherighen hebdi broot onttrocken.

8

Doer die stercheyt ws arms hebdi dlant beseten, ende dalder machtichste hebt ghi dat in ghehouden.

9

Die weduwen hebdi ydel laten gaen, ⁺ende die armen der weesen hebdi in stucken ghebroken.

+ B

10

Daer om sijdi met stricken omuanghen, ende den onuersienighen anxt verstoort v.

11

Ende ghy meyndet dat ghy die duysternissen niet sien en soudt, ende dat ghy met den ghedruysche van die oueruloedende wateren niet en soudt verdruct worden?

12

Oft peynsdi dat Godt hoogher dan den hemel is, ende dat hi bouen den top der sterren verhauen is?

13

Ende ghy segghet, wat weet Godt? ende hy ordeelt als doer eenen neuel.

14

Die wolcken sijn zijn scuylinghe, noch hy en aenmerct onse dinghen niet, ende omtrent die herren des hemels wandelt hy.

15

Wilde ghy den padt van des werelts tijden bewaren, den welcken ghetreden hebben die boose mannen.

16

Die wech ghenomen sijn voer haren tijt, ⁺ende den vloet heeft hen fundament omgheworpen.

+ C

17

Die Gode seyden, Gaet van ons, ende recht oft die almachtighe niet machtich en ware iet te doen, soo hebben sij hem gheacht,

18

daer hy nochtans hen huysen met goede veruult hadde, der welcker sin sij verre van my.

19

Die rechtuerdighe sullen sien, ende blyde sijn, ende die onnoosele salse bespotten.

20

En es hen opghehauenheyt niet afghehouwen, ende en heeft dat vier hen bleuelinghen niet verslonden?

21

Daer om vereenicht v met hem en hebt vrede, ende doer dese dinghen suldi die beste vruchten hebben.

22

Ontfanct wt sijnen mont die wet, ende stelt sijn woerden in v herte.

23

Eest sake dat ghy wederkeert totten almachtighen soo suldi ghesticht worden, ende ghy sult die boosheyt verre van v tabernakel doen.

24

⁺Hy sal voor eerde harde steenen gheuen, ende voor die harde steenen gulden beken.

+ D

25

Ende die almactighe sal teghen v vianden sijn, ende tsiluer sal v toeghehoopt worden.

26

Dan suldy opden almachtighen van wellusticheden oueruloeden, ende v aensicht tot Godt opheffen.

27

Ghy sult hem bidden, ende hy sal v verhooren, ende v gheloften suldi betalen.

28

Ghy sult een dinck voernemen, ende tsal v comen, ende in v weghen sal dlicht scijnen.

29

Want die verootmoedicht es gheweest, sal in glorien sijn, ende wie sijn ooghen nederslaet die sal behouden worden.

30

Die onsculdighe sal behouden worden, maer hy sal behouden worden in die suyuerheyt van sijnen handen.