Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺UAnden almachtighen en sijn die tijden niet verborghen, maer die hem kennen, en weeten sijn daghen niet.

+ A

2

Die andere hebben die palen verstelt, die cudden hebben sij gherooft, ende die ghevoedt.

3

Der weesen esel hebben sij wech ghedreuen, ende voer eenen pant hebben sij wechgenomen der weduwen osse.

4

Sij hebben verkeert den wech van den armen, ende te samen verdruct die saechtmoedighe des lants.

5

Die andere gaen wt (als wilde ezels in die woestijne) tot hen werck, wakende nae den roof, bereyden sij broot haren kinderen.

6

Sij mayen aff den acker die hen niet toe en behoort, ende den wijngaert vanden ghenen die sij met ghewelt verdruct hebben snyden sij af.

7

Naect laten sij die menschen hen cleederen nemende, die gheen decsel en hebben in die couwe.

8

Die welcke den reghen vanden berghen nat maect, ende die gheen decsel hebbende die steenen omuanghen.

9

⁺Ghewelt hebben sij ghedaen beroouende die weesen, ende dat ghemeyn arm volck hebben sij berooft.

+ B

10

Den naecten ende gaende sonder, cleedt ende den hongherighen hebben sij die aeren ontnomen.

11

Tusschen die hoopen der gheender die dorst lijden nae dat sij die persse hebben ghetreden, hebben sij haren noen rust ghenomen.

12

Van die steden hebben sij die mans doen suchten, ende die ziele der ghewonder heeft gheroepen, ende Godt en laetet niet onghewroken voorby gaen.

13

Sij hebben den licht wederspannich gheweest, sij en hebben sijn weghen niet gheweten, noch sij en sijn niet wederghekeert doer sijn weghen.

14

Ten iersten morghen stont staet een mordenaer op, hi slaet doot den behoeftighen ende den armen, maer by nacht soo sal hy sijn als een dief.

15

⁺Die ooghe des ouerspelders wacht nae die donckerheyt, segghende, Gheen ooghe en sal my sien, ende hy sal sijn aensicht bedecken.

+ C

16

Hy doergraeft int doncker die huysen, ghelijck sij in den dach malcanderen toegheseyt hadden, ende sij en hebben van dat licht niet gheweten.

17

Eest dat onuersienlijck den dagheraet scijnt, soe achten sij dien als die scaduwe des doots, ende alsoe wandelen sij in duysternissen ghelijck int licht.

18

Hy es licht bouen daenscijn der wateren, vermalendijt sij sijn deel op die aerde, noch hy en wandele niet doer den wech der wijngaerden.

19

Tot te seer groote hitte moet hy voerts gaen van die sneuwateren, ende tot die helle sijn sonde.

20

Die bermherticheyt moet sijns vergheten, sijn sueticheyt moeten wormen worden, sijns en worde niet meer ghedacht. ⁺Maer in stucken moet hy ghebroken worden als een onvruchtbaer hout.

+ D

21

Want hy heeft een onvruchtbarighe gheuoedt ende een die niet en baert, ende der weduwen en heeft hy niet wel ghedaen.

22

Hy heeft die stercke nederghetrocken in sijn stercheyt, ende als hy staen sal, soe en sal hy sijnen leuen niet betrouwen.

23

Godt heeft hem plaetse van penitencie ghegheuen, maer hy misbruyct die tot houerdien, maer sijn ooghen sijn in sijn weghen.

24

Sy sijn een luttelken opghehauen, ende sij en sullen niet blijuen staende, ende sij sullen vernedert worden ghelijck alle dinghen, ende wechghenomen, ende ghelijck die tsoppen der aeren sullen sij in stucken ghewreuen worden.

25

En eest alsoo niet, wie mach my straffen dat ick gheloghen hebbe, ende stellen voer Godt mijn woerden?