Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde Baldad die Suhiter antwoordende heeft gheseydt.

+ A

2

Tot wat eynde suldy woorden stroyen, verstaet ierstmael, ende laet ons alsoo spreken.

3

Waerom sijn wij gheacht als beesten, ende sijn onreyn gheworden voor v?

4

Die v ziele doodt in v rasende gramscap, sal die eerde om uwen wille verlaten worden, ende sullen die steenrootsen veruoert worden van hen plaetse.

5

En sal dat licht des ongoddelijcs niet wtghedaen worden? noch die vlamme van sijnen viere en sal niet berren?

6

Dlicht sal verduysteren in sijn tabernakele, ende dat lichtuat dat op sijn hooft is sal wt ghedaen worden.

7

Die ganghen van sijnder cracht sullen benaut worden, ende sijnen raet sal hem ter neder worpen.

8

Want hy heeft sijn voeten int nette ghesteken, ende in sijn smetten wandelt hy.

9

Die plante sijns voets sal metten strick ghehouden worden, ende den dorst sal teghen hem verhitten.

10

Sijnen strick is in deerde verborghen, ende sijn clippeer valle opden padt.

11

⁺Van allen sijden sullen hem die grouwelen veruaeren, ende sijn voeten sullen hem omwinden.

+ C

12

Sijn cracht moet van honger vermindert worden, ende den honger moet in sijn ribben varen

13

Ende verslinde die schoonheyt van sijnder huyt, die ierste gheboren doot, laet verteeren sijn armen.

14

Sijn betrouwen moet van sijn tabernakele afghetrocken worden, ende die verderffenisse terde op hem als een coninck.

15

In sijn tabernakel moeten woonen die ghesellen van hem die niet en is, solfer worde in sijn tabernakel bespraeyt.

16

⁺Beneden moeten sijn wortelen verdroocht worden maer bouen soo moet sijnen oochst verdoruen worden.

+ D

17

Sijn ghedenckenisse vergae vander eerden, ende sijnen naem en worde niet vermaert in die straten.

18

Hy sal hem verdrijuen wt dat licht in die duysternissen, ende vander werelt sal hy hem wech voeren.

19

Sijn saet en sal niet wesen, noch gheen afcoemste in sijn volck, noch gheen bleuelingen in sijn landen.

20

Op sijnen dach sullen die wterste verbaest sijn, ende dalder ierste sal den grouwel beuanghen.

21

Dit sijn dan die tabernakelen vanden boosen, ende dit is die plaetse van hem die Gode niet en kent.