Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺MYnen gheest sal flau worden, mijn daghen sullen ghecort worden, ende alleen blijft my ouer dat graf.

+ A

2

Ic en heb niet ghesondicht ende in bitterheden woont mijn ooghe.

3

Verlost my, ende stelt my neuen v, ende wiens hant ghy wilt laet teghen my strijden.

4

Hen herte hebdi verre ghedaen van die leeringhe, ende daerom en sullen sij niet verhauen worden.

5

⁺Den roof gheloeft hy sijnen ghesellen, ende die ooghen van sijnen kinderen sullen gebreken.

+ B

6

Hy heeft my ghestelt als in een ghemeyn segghen vanden ghemeynen volcke, ende een exempel ben ick voor henlieden.

7

Verduystert is mijn ooghe van verbolghentheden, ende mijn leden sijn bij nae te niet ghebracht.

8

Die rechtuerdighe sullen hen daer af verwonderen, ende die onnoosele sal teghen den hypocrijt verwect worden.

9

⁺Ende die rechtuerdighe sal sijnen wech houden, ende tot die suyuer handen sal hi stercheyt doen.

+ C

10

Daerom bekeert v ghi alle gader ende coemt, ende ick en sal onder v lieden niet eenen wijsen vinden.

11

Mijn dagen sijn ouerleden, mijn ghedachten sijn verstroyt, pijnende mijn herte.

12

Den nacht hebben sij ghekeert inden dach, ende wederom nae die duysternissen hope ick dlicht.

13

⁺Eest dat ict verbeyde, soo is die helle mijn huys, ende in die duysternissen heb ick mijn beddeken ghemaect.

+ D

14

Den ettere heb ick gheseyt. Ghy sijt mijn vader, mijn moeder, ende mijn suster, den wormen.

15

Hierom waer is nv mijn verwachten, ende wie aenmerct mijn verduldicheyt?

16

In die diepste helle salt alle dat mijn is nederdalen, meyndi oock dat my ten minsten daer ruste sal wesen?