Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde Eliphas die Themaniter antwoordende heeft gheseyt.

+ A

2

Sal een wijs man antwoorden als inden wint sprekende, ende sal hy met hitten sijn maghe vullen?

3

Ghy straft hem met woorden die ws ghelijck niet en is, ende ghy spreect dat v niet orboorlijck en is.

4

Soo veel alst in v is, soo hebdi die vreese ydel ghemaect, ende ghy hebt wech ghenomen die ghebeden voor Godt.

5

Want v boosheyt heeft uwen mont gheleerdt, ende ghy volcht nae die tonghen vander blasphemeerders.

6

Vwen mont sal v verdoemen, ende niet icke, ende v lippen sullen v antwoorden.

7

Sijt ghy dierste mensch gheboren, ende voor alle die hueuelen ghemaect?

8

Hebdi Godts raet ghehoort, ende sal sijn wijsheyt minder wesen dan ghy?

9

Wat weet ghy dat wij niet en weten? wat verstaedi, dat ons ombekent is?

10

⁺Ouders ende seer oude luyden sijn onder ons, veel ouder dan v vaderen. [afbeelding]

+ B

11

Eest groot dat v Godt vertrooste? maer v quade woorden beletten dat.

12

Waerom verheft v herte, ende hebt (als groote dingen peysende) verbaesde ooghen?

13

Waerom is uwen gheest opgheblasen tegen God dat ghy wt uwen mont alsulcken woorden voortbrengt?

14

Wat is een mensch dat hy onbesmedt soude sijn, ende dat hy rechtuerdich soude schijnen gheboren van eender vrouwen.

15

Siet onder sijn heyligen en is niemant onwandelbaer, ende die hemelen en sijn niet suyuer in sijn aenscouwen.

16

Hoe veel te meer die afgrijselijcke ende onnutte mensch, die ongherechticheyt drinct als water.

17

Ick salt v toonen, hoort my, dat ick ghesien hebbe sal ick v vertellen.

18

Die wijse belijdent, ende sij en verberghen dat voor hen vaders niet.

19

⁺Den welcken alleene die eerde ghegheuen is, ende daer en is gheen vreemde door hen ghegaen.

+ C

20

Alle sijn daghen verhoouerdicht hem die ongoddelijcke, ende tghetal der iaren van sijn tyrantscap is onseker.

21

Tgheluyt der veruaertheyt is altijt in sijn ooren, ende alst pays is, soo vermoedt hy altijt laghen.

22

Hy en gheloeft niet dat hy soude moghen wederkeeren van die duysternissen tot den lichte, tot alle sijden ommesiende nae tsweert.

23

Als hy hem roert om broot te soecken, soo weet hy wel dat in syn hant bereyt is den dach der duysternissen.

24

Die tribulatie sal hem veruaeren, ende die bangicheyt sal hem omringhen, ghelijck een coninck die ten strijde bereydt wort.

25

Want hy heeft teghen Godt sijn hant wtghereyct, ende teghen den almachtighen is hy versterct.

26

Hy heeft teghen hem gheloopen met eenen opgherichten hals, ende met eenen vetten necke is hy ghewapent.

27

Die vetticheyt heeft sijn aensicht bedect, ende van sijnder sijden hanghet tsmeer nederwaerts.

28

⁺Hy heeft ghewoont in die verwoeste steden, ende in die verlaten huysen, die tot hoopen ghebracht sijn.

+ D

29

Hy en sal niet rijck worden, noch sijn goet en sal niet dueren, noch hy en sal sijn wortel in die aerde niet scieten.

30

Hy en sal van die duysternisse niet gaen, die vlamme sal sijn tacken verdrooghen, ende hy sal wechghenomen worden door den gheest sijns monts.

31

Hy en sal niet gheloouen sonder sake door dolinghe bedroghen sijnde dat hy met eenighen prijs sal verlost worden.

32

Eer sijn daghen veruult sullen sijn, soo sal hy vergaen, ende sijn handen sullen verdorren.

33

Sijnen druyf sal ghescent worden als den wijngaert in sijn ierste bloeytsel, ende ghelijck eenen olijfboom sijn bloeytsel afworpende.

34

Want die vergaderinghe vanden hypocrijt is on-

[p. *431]

vruchtbaer, ende tvier sal hen tabernakelen verslinden die gheerne ghiften ontfangen.

35

Hy heeft droefheyt ontfanghen ende boosheyt ghebaert, ende sijnen buyck bereydt te voren bedriechlijcheden.