Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺EEn mensch vander vrouwen gheboren, corten tijt leuende, wort veruult met veel allendicheden.

+ A

2

Die ghelijck een bloeme wtcoemt ende wort in stucken ghewreuen, ende vliedt wech als een scaduwe, ende nemmermeer en blijft hy in eenen staet.

3

Ende duncket v weerdich op alsulcken v ooghen te openen, ende dien met v te brenghen int ordeel?

[p. *430]

4

Wie mach doch suyuer maken den ghenen die van onsuyueren sade ontfanghen is? en moechdi ghy dat niet die alleene sijt?

5

Cort sijn des menschen daghen tghetal sijnder maenden is by v, ghy hebt sijn eynden ghestelt, ⁺die niet en sullen moghen voorby ghegaen worden.

+ B

6

Gaet een luttelken van hem, dat hi ruste, tot dat sijnen begheerden dach (als eens huerlincs) come.

7

Eenen boom heeft hope, eest dat hy afghehouwen wort, soo wordt hy wederom groeyende, ende sijn tacken spruyten wt.

8

Eest dat sijn wortel in deerde veroudert is, ende dat sijnen bloc int stof der aerden verstoruen is.

9

Tot den rueck des waters sal hi groeyen, ende eenen crans maken ghelijck doent ierstmael gheplant was.

10

Maer een mensch als hy ghestoruen is, ende ghebloodt, ende verteert, waer es hy doch?

11

Ghelijc oft die wateren vander zee wechghinghen ende dat den vloet ydel worde ende verdroochde.

12

⁺Alsoo en sal een mensch (als hy ontslapen is) niet weder opstaen, tot dat den hemel versleten is, soo en sal hy niet ontwaken, nocht opstaen van sijnen slaep.

+ C

13

Wie gheue my dit, dat ghy my in die helle beschermet, ende my verborghet, tot dat uwen rasenden toren ooorby ghegaen sij, ende dat ghy my tijt stelt inden welcken ghy mijns ghedencket.

14

Meyndi oock dat een doot mensch wederom leuen sal? tot alle die daghen in die welcke ick nv strijde, soo verwacht ick, tot dat mijn veranderinghe come.

15

Ghy sult my roepen, ende ick sal v antwoorden, den wercke uwer handen suldi v rechte hant wtreycken.

16

Ghy hebt voorwaer mijn ganghen ghetelt, maer spaert mijn sonden.

17

⁺Ghy hebt als in een saxken mijn versuemenissen gheteekent, maer ghy hebt mijn boosheyt ghenesen.

+ D

18

Eenen vallende berch veruliet, ende eenen steen wort veruoert van sijn plaetse.

19

Die wateren holen die steenen, ende met die aenulietinghe wort allinxkens die eerde verteert, ende daerom suldy die menschen desghelijcs vernielen.

20

Ghi hebt hem een luttelken versterct om dat hy in der eewicheyt soude doorgaen, ghy sult sijn aensicht veranderen, ende ghy sult hem wt laten.

21

Tsij oft sijn kinderen edel sijn, oft onedel, dat en sal hy niet verstaen.

22

Nochtans sal sijn vleesch (soo langhe als hy leeft) pijn lijden, ende sijn ziele sal op haer seluen bedroeft sijn.