Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺SIet alle dese dinghen heeft mijn ooghe ghesien ende mijn oore heuet ghehoort, ende ic hebt elck bysonder verstaen.

+ A

2

Nae v lieder wetenheyt, weet ict oock, noch ick en ben niet meerder dan ghilieden.

3

Maer nochtans sal ick spreken totten almachtighen, ende ick begheere met Godt te disputeren.

4

Ierstmael toonende dat ghy logen versierders sijt ende liefhebbers van verkeerde leeringen.

5

Ende och oft ghy sweecht, datmen v voor wijse luyden achten mocht.

6

Daerom hoort mijn straffinghen, ende dat recht ordeel van mijnen lippen aenmercket.

7

Heeft Godt v loghene ghebrec, dat ghy voor hem bedriechlijcheden spreken soudt.

8

Neemde ghi wt sijn aensicht, ende arbeydi voor Godt te ordeelen.

9

⁺Oft sal hem behagen, voor wien niet en mach verborghen worden, oft sal hy bedroghen worden, ghelijck een mensch, met uwe bedriechlijcheden.

+ B

10

Hy sal v straffen, want ghy neemt sijn aensicht int heymelijck.

11

Ter stont als hy hem verroert sal hebben, soo sal hi v lieden verstooren, ende sijnen grouwel sal v oueruallen.

12

V ghedenckenisse sal gheleken worden den asschen, ende v necken sullen tot slijck verteert worden.

13

Swijcht een weynich, dat ick spreken mach al dat my mijn herte in gheeft.

14

Waerom scoere ick mijn vleesch met mijnen tanden, ende draghe mijn ziele in mijn handen?

15

Ooc al sloech hy my doot, soo sal ic in hem hopen, maer nochtans sal ic mijn wegen in sijn aenscouwen straffen.

16

⁺Ende hy sal mijn salichmaker sijn, want in sijn aenscouwen en sal gheen hypocrijt comen.

+ C

17

Hoort mijn redene, ende mijn doncker woorden ontfaet met uwen ooren.

18

Eest dat ic nae recht gheuonnist worde, soo weet ick dat ick rechtuaerdich sal gheuonden worden.

19

Wie isser die met mi mach geordeelt worden? die come, waerom worde ic swijghende vernielt?

20

Alleen twee dinghen en doet my niet, ende dan en sal ick van uwen aensicht niet verberghen worden.

21

V hant doet verre van my, ende uwen grouwel en verscricke my niet.

22

Roept my, ende ick sal v antwoorden, oft emmer ick sal spreken, ende antwoort my ghy.

23

⁺Hoe grooten boosheden ende sonden heb ic, mijn groote misdaden ende versuemenissen thoont my.

+ D

24

Waerom verberchdi v aensicht, ende meynt dat ick v viant ben?

25

Tegen een blat dat metten wint wech ghenomen wort thoondi v machticheyt, ende een dorre stoppele veruolchdi.

26

Want ghi scrijft tegen my bitterheden, ende ghy wilt my verdoen door die sonden mijnder iongher iuecht.

27

Ghy hebt mijnen voet inden veterstock ghestelt, ende ghy hebt gade gheslaghen alle mijn wegen, ende die voetstappen mijnder voeten hebdi bemerct.

28

Die als verrotheyt verteert sal worden ende ghelijck een cleedt dat gheten wort vanden motten.