Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde Iob antwoordende heeft gheseydt.

+ A

2

Sijdi dan alleen menschen, ende sal die wijsheyt met v lieden steruen?

3

Ick heb ooc een herte alsoo wel als ghy noch ick en ben niet neerdere dan ghilieden, want wie en weet dese dinghen niet die ghy weet?

4

Die van sijnen viant bespot wort gelijc ick, die sal Godt aenroepen, ende hy sal hem verhooren, want die simpelheyt vanden onnooselen wort begect.

5

Sij is een versmaedde lampe by die ghedachten vanden rijcken, bereydt totten ghesetten tijde.

6

Die tabernakelen vanden roouers sijn oueruloedich, ende sij verwecken Godt stoutelijck. ⁺Als hijt al in hen handen ghegheuen heeft.

+ B

7

Sekerlijck vraget die beesten, ende sij sullent v leeren, ende vraget die voghelen des hemels, ende sij sullent v te kennen gheuen.

8

Segghet der eerden, ende sij sal v antwoorden, ende die visschen der zee sullent vertellen.

9

Wie en weet niet dat alle dese dingen des Heeren hant ghemaect heeft.

10

In wiens hant is die ziele van alle dat leuende is, ende den gheest van alle des menschen vleesch?

11

En ondersceydt die oore niet die woorden, ende den mont des eters den smake der spijsen?

12

In die ouderen is wijsheyt ende in veel tijts voorsienicheyt.

13

⁺By hem is wijsheyt, ende sterckheyt, Hy heeft den raet, ende verstandicheyt.

+ C

14

Eest dat hy verderft, soo en is daer niemant diet optimmeren mach. Eest dat hy eenen mensch besluydt, soo en isser niemant diet open doen mach.

15

Eest dat hy wateren ophoudt, soo verdrooghet al, eest dat hy die wt laet, soo sullen sij dat lant omworpen.

16

By hem is stercheyt ende wijsheyt, hy kent oock den ghenen die bedriecht, ende den ghenen die bedrogen wort.

17

Hy leyt die raetsluyden tot een dwaes eynde, ende die rechters tot verwonderinghe.

18

Den gordel der coninghen ontbint hy, ende omgort hen lendenen met eenen seele.

19

Hy leydt die priesters sonder eere, ende die edelste vertreedt hy.

20

⁺Veranderende die lippe vanden warachtigen, ende die leeringhen der ouders wechnemende.

+ D

21

Hy stort versmaetheyt wt op die princen, ende die ghene die verdruct waren weder opheffende.

22

Die de diepten openbaert van die duysternissen, ende brengt int licht die scaduwe des doots.

23

Die vermenichfuldicht dat volc ende vernieltse, ende als si verdoruen sijn, so stelt hi die wederom inden iersten staet.

24

Die verandert therte vanden princen des volcks der eerden, ende bedriechtse dat sij te vergheefs gaen door den omwech.

25

Sij sullen tasten als in duysternissen ende niet int licht, ende hy salse doen dolen als droncken luyden.