Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde Iob antwoordende heeft gheseydt.

+ A

2

Voorwaer ic weet wel dat soo is, ende dat een mensch niet gerechtuerdicht en wort by Gode geleken.

3

Eest dat hy met hem wilt kijuen, so en sal hy hem niet een voor duysent moghen antwoorden.

4

Hij is

[p. *428]

wijs van herten, ende sterck van machte, wie heeft hem wederstaen, ende vrede ghehadt?

5

Die die bergen veruoert heeft, ende sij en hebbens niet gheweten, die hy omghekeert heeft in sijn rasende gramscap.

6

Die de aerde verroert van haerder plaetsen, ende haer columnen worden te gader ghestooten.

7

Die der sonnen ghebiedt, ende sij en gaet niet op, ende sluyt die sterren als onder eenen seghel.

8

Die alleen die hemelen wtbreyt ende gaet op die baren der zee.

9

Die den Arcturum ende den Oriona ende die Hiaden maect, ende dat binnenste van suyden.

10

⁺Die groote ende onbegrijpelijcke dinghen maect, ende wonderlijcheden der welcker gheen ghetal en is.

+ B

11

Eest dat hi tot my coemt, soo en sal ic hem niet sien, eest dat hy wech gaet dat en sal ick niet verstaen.

12

Eest dat hy onuersiens vraghet, wie sal hem antwoorden? Oft wie mach segghen.Waerom doet ghi alsoo?

13

Godt wiens gramscap niet en mach wederstaen, ende onder wien sij gheboocht worden die die werelt draghen.

14

Hoe groot ben ick dan, dat ick hem antwoorden soude, ende spreken met mijnen woorden tot hem?

15

Al waert soo dat ick hadde iet rechtuerdichs, ick en sal niet antwoorden, maer ick sal mijnen richter bidden.

16

Ende als hy my aenroepende verhoort heeft, soo en ghelooue ic niet dat hy mijn stemme ghehoort heeft.

17

Want met eenen stormenden wint sal hy my in stucken breken, ende hy sal mijn wonden vermenichfuldigen oock sonder sake.

18

Hy en verleent mijnen gheest gheen ruste, ⁺ende hy veruult my met bitterheden.

+ C

19

Eest datmen stercheyt soect, hy is die alder stercste soectmen gherechticheyt des ordeels, soo en derret niemant voor my ghetuyghenis spreken.

20

Eest dat ick my seluen rechtuerdich maken wille, soo sal mijnen mont my verdoemen, ende thoon ick my onnoosele, soo sal hy bewijsen dat ick quaet ben.

21

Oock eest dat ick slecht ben, dat selue en sal mijn ziele niet weten, ende mijn leuen sal my verdrieten.

22

Een dinck isser dat ic gheseyt hebbe, dat hy den onnoselen ende den ongoddelijcken vernielt.

23

Eest dat hy gheesselt, soo laet hem eens doot slaen, ende hy en lache niet van die pijnen der onnooselen.

24

Dat lant is ghegeuen in die hant vanden ongoddelijcken, hy bedect haerder richteren aensicht, en is hijt niet? wie eest dan?

25

Mijn daghen hebben snelder gheweest dan een looper sij sijn wechgheuloden, ende en hebben gheen goet ghesien.

26

⁺Sij sijn door ghegaen ghelijck scepen die appelen voeren, ghelijck eenen aern vlieghende totten ase.

+ D

27

Als ick segghe. Ick en sal alsoo niet meer spreken, soo verander ick mijn aensicht, ende worde met pijnen ghequelt.

28

Ic verscroomde my in alle mijn wercken wetende dat ghy den misdoende niet en spaert.

29

Maer eest sake dat ick alsoo oock ongoddelijc ben waerom heb ic dan te vergheefs ghearbeyt.

30

Eest dat ick ghewasschen worde als met sneeu wateren, ende dat mijn handen blincken als dalder suyuerste.

31

Nochtans suldi my in die vuylicheyt doppen, ende mijn cleederen sullen hen van my grouwelen.

32

Want ick en sal niet antwoorden eenen man die mijns ghelijck is, noch die met my int recht mocht gelijckelijck ghehoort worden.

33

Daer en is niemant diese beyde soude connen straffen, ende sijn hant legghen in alle beyde.

34

Hy neme sijn roede van my, ende sijn vreese en veruaere my niet.

35

Ick sal spreken ende hem niet vreesen want ick en mach al vreesende niet antwoorden.