Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde Baldad die Suhiter antwoordende, seyde.

+ A

2

Hoe langhe suldi sulcke woorden spreken, ende hoe langhe sal den gheest van die sprake ws monts menichfuldich sijn.?

3

Meyndi dat Godt het recht ordeel onder die voeten treedt? oft dat die almachtighe verkeert dat rechtuerdich is?

4

Oock al eest dat v kinderen ghesondicht hebben, ende dat hy die ghelaten heeft in die hant van haerlieder boosheyt.

5

Nochtans eest sake dat ghy des morghens vroech opstaet tot Godt, ende dat ghy den almachtighen biddet.

6

Eest dat ghy suyuer ende recht wandelt, soo sal hy ter stont tot v ontwaken, ⁺ende sal die wooninghe uwer rechtuaerdicheyt vredelijck maken.

+ B

7

Alsoo seere dat al waert dat v ierste cleyn waren, soo sullen v laetste bouen maten seer vermenichfuldicht worden.

8

Want vraecht den voorgaende gheslachte, ende ondersoect neerstelijck der vaderen ghedenckenisse.

9

Want wij sijn van ghisteren, ende wij en weten niet dat ons daghen sijn als een scaduwe op die aerde.

10

Ende sij sullen v leeren, sij sullent v segghen, ende wt hen herten die spraken voorts brenghen.

11

Mach die biese groeyen sonder vochticheyt? oft dat lisch wassen sonder water?

12

⁺Alst noch int bloeyen is, ende metter handt noch niet ghepluct en wort, soo verdorret eer dan alle cruyden.

+ C

13

Alsoo sijn die weghen van alle die ghene die Godt vergheten, ende die hope vanden hypocrijt sal vergaen.

14

Sijn dwaesheyt en sal hem niet behaghen ende ghelijck die spinnen webbe is sijn betrouwen.

15

Hy sal rusten op sijn huys, ende ten sal niet staende blijuen, hy sal dat ondersetten, ende ten sal niet oprijsen.

16

Hij scijnt vochtich te sijn eer die sonne coemt, ende in haren opganck sal sijn spruytsel wtcomen.

17

⁺Op eenen hoop steenen sullen sijn wortelen dick worden, ende tusschen die steenen sal hy blijuen.

+ D

18

Eest dat hy hem verslint van sijnder plaetsen, soo sal hy hem loochenen, ende segghen. Ic en ken v niet?

19

Want dit is die blijscap sijns wechs, datter wederom wt die eerde ander spruyten souden.

20

Godt en sal den simpelen niet wech worpen, noch die hant reycken die quaden.

21

Tot dat uwen mont met lachen veruult worde, ende v lippen met iolijt.

22

Die v haten, sullen ghecleedt worden met bescaemtheyt, ende der ongoddelijcker tabernakel en sal niet staende blijuen.