Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺EEnen strijdt is des menschen leuen op die aerde, ende ghelijc die daghen eens huerlincs sijn sijn daghen.

+ A

2

Ghelijc een knecht die scaduwe begheert, ende ghelijck een huerlinck verwacht dat eynde sijns wercs.

3

Alsoo heb ic ooc ghehadt leghe maenden, ende arbeydelijcke nachten heb ick voor my ghetelt.

4

Eest dat ick slapen gae, soo sal ick segghen. Wanneer sal ick opstaen? ende dan sal ick wederom nae den auont wachten, ende ick sal met pijnen veruult worden tot die duysternissen toe.

5

Mijn vleesch is ghecleedt met verrotheyt, ⁺ende met die vuylicheyt des ghestubs is mijn huyt dorre gheworden, ende vercrompen.

+ B

6

Mijn daghen sijn rasscher doorghegaen, dan den webben draet vanden weuer afghesneden wordt, ende sij sijn vergaen sonder eenighe hope.

7

Ghedenct dat mijn leuen eenen wint is, ende dat mijn ooghe niet wederkeeren en sal om goede dinghen te sien.

8

Ende des menschens ghesicht en sal my niet aensien, v ooghen sijn op my, ende ick en sal niet ghedueren.

9

Ghelijck een wolcke wort te niet, ende gaet voorby, also die inder hellen nederwaerts gaet, en sal niet weder opclimmen.

10

Noch hy en sal niet meer in sijn huys wedercomen, ⁺noch sijn plaetse en sal hem niet meer kennen.

+ C

11

Daerom en sal ick mijnen mont niet sparen, ick sal spreken in die tribulacie mijns gheests, Ick sal sprake houden met die bitterheyt mijnder zielen.

12

Ben ick dan die zee, oft eenen waluisch, aenghesien dat ghy my omuanghen hebt met eenen kerker?

13

Eest dat ick segge. Mijn beddeken sal my vertroosten, ende ick sal verlicht worden met my seluen sprekende in mijn rustplaetse.

14

Dan suldy my veruaren door droomen, ende door visioenen suldi mi met grouwel bestooten.

15

Daerom heeft mijn ziele vercoren ghehanghen te sijne, ende mijn ghebeente die doot.

16

Ick ben mishoept, ick en sal gheenssins voorts langher leuen, spaert my, want mijn daghen en sijn niet.

17

⁺Wat is een mensch, dat ghi hem groot acht? oft waer toe steldt ghy v herte aen hem?

+ D

18

Ghy besoect hem des morghens vroech, ende onuersienlijck proefdi hem.

19

Hoe langhe en suldi my niet sparen, noch my niet toelaten, dat ic mijn speecsel mocht swelghen?

20

Ick heb ghesondicht, wat sal ick v doen o bewaerder der menschen? waerom hebdi my teghen v ghestelt, ende ick ben my seluen swaer gheworden?

21

Waerom en neemdi mijn sonde niet wech, ende waerom en haeldy mijn boosheyt niet af? siet ick sal nv int stubbe der aerden slapen, ende eest dat ghy my smorghens vroech soect, soo en sal ic dan niet wesen.