Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺DAerom roept, ofter iemant is die v antwoorde, ende keert v tot eenighe vanden heylighen.

+ A

2

Den dwasen mensch doodet die gramscap, ende den cleynen doodet die nijdicheyt.

3

Ick heb den dwasen ghesien met een vaste wortel, ende ik heb sijn schoonheyt vermalendijt ter stont.

4

Verre sullen sijn kinderen worden vander salicheyt, ende sij sullen vernielt worden in die poorte, ende daer en sal niemant sijn diese verlosse.

5

Wiens oochst die hongherighe eten sal, ende die ghewapende sal hem roouen, ende die dorstighe sullen sijn rijckdommen drincken.

6

Niet en ghesciet inder eerden sonder sake, ende wter eerder en sal gheen lijden opstaen.

7

⁺Die mensch wort gheboren tot arbeyt, ende den voghel om te vlieghen.

+ B

8

Waeromme sal ick den Heere bidden, ende tot mijnen Godt sal sal ick mijn wtsprake stellen.

9

Die daer doet groote ende onbegrijpelijcke dinghen, ende wonderlijcke dinghen sonder ghetal.

10

Die den reghen gheeft op daenschijn der aerden ende veruerschet al met wateren.

11

Die de ootmoedighe steldt int hooghe, ende die truerende opricht met ghesontheyt.

12

Die der quader ghedachten verstroyt, dat hen handen niet en moghen volbringhen dat sij begonst hebben.

13

Die de wijse vanght in hen scalcheyt, ende den raet der quader verstroyt.

14

Inden dach sullen sij loopen in die duysternissen, ende als inden nacht, soo sullen sij tasten inden middach.

15

⁺Maer hy sal den behoeftighen verlossen van den sweerde haers monts, ende den armen wt die handt vanden gheweldighen.

+ C

16

Ende den allendighen sal hope sijn, maer die boosheyt sal haren mont toe trecken.

17

Salich is die man die van Godt ghestraft wordt, daerom en veracht des Heeren castijnghe niet.

18

Want hy wont ende hy gheneest, hy slaet, ende sijn handen sullent ghenesen.

19

In ses tribulacien sal hy v verlossen, ende in die seuenste en sal v gheen quaet ghenaken.

20

Inden hongher sal hy v vander doot verlossen, ende in die oorloghe wt des sweerts handt.

21

⁺Voor die gheessele der tonghen suldy verborghen worden, ende ghy en sult die allendicheyt niet vreesen als sij comen sal.

+ D

22

In die verwoestheyt ende inden hongher suldi lachen, ende die beesten der aerden en suldi niet vreesen

23

Maer metten steenen der lantscappen sal v verbont sijn, ende die beesten der aerden sullen met v vredelijc sijn.

24

Ende ghy sult weten dat v tabernakel vrede heeft, ende v ghedaente besoeckende en suldi niet sondighen.

25

Ghy sult oock weten dat v saet sal menichfuldich sijn, ende v geslachte ghelijc dat cruyt der aerden.

26

Ghy sult met oueruloedicheyt int graf gaen, ghelijck eenen schoof terwen in ghedraghen wort te sijnen tijde.

27

Siet ghelijc wij dat ondersocht hebben, alsoo eest, het welcke ghehoort hebbende, ouerlegghet metter herten.