Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde Eliphas die Themaniter antwoordende heeft gheseyt.

+ A

2

Eest dat wij v beghinnen

[p. *426]

aen te spreken, ghy suldt dat by auontueren swaerlijc nemen, maer wie mach dat voorghenomen woort houden?

3

Siet ghy hebter veele gheleert, ende moede handen hebdi versterct.

4

V woorden hebben gheuesticht die wanckelbaer waren, ende die beuende knien hebdi vroom ghemaect.

5

Maer nv is die plaghe op v ghecomen, ende ghy sijt onmachtich gheworden sij heeft v gheraect, ⁺ende ghy sijt ontsteldt.

+ B

6

Waer is v vreese, v stercheyt, v verduldicheyt, ende die volmaectheyt van uwen weghen?

7

Weest ghedachtich (dat bidde ic v) wie datter oyt onnoosel verloren is ghegaen, oft wanneer dat die gherechtige vernielt sijn?

8

Maer meer heb ick ghesien dat die boosheyt doen, ende smerten saeyen, ende die maeyen,

9

vergaen sijn door Gods blasen, ende dat sij met den gheest sijnder gramscappen vernielt sijn.

10

Dat briesschen vanden leeuw, ende die stemme der leeuwinnen, ende die tanden van die welpens der leeuwen sijn ghebroken.

11

Den tygris is vergaen, om dat hy gheenen roof en hadde, ⁺ende die welpens vanden leeuwe sijn verstroyt.

+ C

12

Voorts soo is tot my een verborghen woort gheseydt, ende als dieffelijck heeft mijn oore ontfanghen die aderen van sijnder lijslijcker spraken.

13

Inden grouwel van des nachts visioen, als den slaep die menschen pleech te beuanghen.

14

Soo heeft my vreese omuanghen ende beuinghe, ende alle mijn ghebeenten verscricten.

15

Ende doen den gheest in mijnder teghenwoordicheyt voorby ghinck, soo rechten hem op die hairen mijns vleeschs.

16

Daer stont een, wiens aensicht ick niet en kende, een ghelijckenisse voor mijn ooghen, ⁺ende ick heb ghehoort een stemme ghelijck van een saecht windeken.

+ D

17

Sal een mensch by Godt gheleken oock gherechtuerdicht worden, oft sal een man puerder wesen dan sijn scepper?

18

Siet die hem dienen en sijn niet ghestadich, ende in sijn Enghelen heeft hy boosheyt gheuonden.

19

Hoe veel te meer sullen sij die in leemen huysen woonen die een eertsch fundament hebben, verteert worden als vanden motten?

20

Van smorghens totten auont sullen sij afghehouwen worden, ende om dat niemant en verstaet, soo sullen si inder eewicheyt vergaen.

21

Maer die daer ouerbleuen sullen sijn, die sullen van hem wech ghehaelt worden, sij sullen steruen, ende niet in wijsheden.