Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde hy gheboodt haer (sonder twijfel Mardocheus Estheren) dat sij tot den coninc ingaen soude, ende bidden voor haer volc ende voor haer lant.

+ A

2

Ghedenct (sprac hy) der daghen uwer nederheyt hoe dat ghy opgheuoet sijt onder mijn hant,

3

want Aman die tweede naest den coninck heeft teghen ons ghesproken om te dooden, ende aenroept ghy den Heere, ende spreect den coninck voor ons, ende verlost ons vander doot.

Dese woorden oock die hier onder staen.

4

Maer opden derden dach heeft sij afgheleydt die cleederen van haren rouwe, ende heeft haer glorie aenghedaen,

5

⁺Ende als sij met coninclijc habijt schoon blincte, ende aengheroepen hadde Godt den regeerder ende behouder van al, soo heeft sij twee dienstioncfrouwen mede ghenomen,

+ B

6

ende op die een leende sij, recht oft sij van weelden ende grooter teederheyt haer lichaem niet draghen en mocht,

7

ende die ander dienstioncfrouwe volchde haer vrouwe, ophoudende haer cleederen die op die aerde neder sleypten,

8

Ende met een rosette verwe ouer haer aensicht blosende, ende met aenghenaem ende blinckende ooghen bedect sij haren droeuighen ende met te seer groote vreese benauden moet.

9

Aldus is sij door alle die doeren deen nae dander ingheghaen, ⁺ende stont teghen ouer den coninc, daer hy sadt opden stoel sijns rijcs, ghecleet met coninclijcke cleederen, ende blinckende van goude ende costelijcke ghesteente, ende hi was veruaerlijck van aensien.

+ C

10

Ende als hy sijn aensicht opgehauen hadde ende met berrenden ooghen die rasende gramscap sijns herten te kennen ghegeuen hadde, soo viel die coninghinne neder, ende veranderende haer verwe in bleecheyt, heeft si haer vermoeyt hooft op haer dienstioncfrouwe nedergheleyt.

11

Ende Godt heeft des conincs gheest in saechtmoedicheyt verkeert, ende haestende ende vreesende spranck hy wt sijnen coninclijcken stoel, ende onderhoudende haer met sijnen armen, tot dat sij tot haer seluen quam, heeft hy haer met desen woorden suetelijc aenghesproken.

12

⁺Wat hebdi Esther, Ick ben v broeder,

+ D

13

en wilt niet vreesen. Ghy en sult niet steruen, Want dese wet en is voor v niet, maer voor alle dandere ghestelt,

14

Daerom coemt naerder ende raect den scepter,

15

Ende doen sij sweech, soo heeft hy die gulden roede ghenomen, ende die op haren hals gheleyt, ende hy heeft haer ghecust, ende seyde. Waerom en spreect ghy my niet aen?

16

Die welcke heeft gheantwoort. Ic heb v ghesien heere als Gods Enghel, ende mijn herte worde verscrict van die vreese uwer glorien,

17

Want ghi sijt seer wonderlijck heere, ende v aensicht is vol gratien

18

Ende die wijle dat sij sprack soo is sij wederom gheuallen, ende gaf by nae haren gheest,

19

Ende die coninck was verbaest, ende alle sijn dienaers troosten haer.

Die copie van des conincs Artaxersis brief den welcken hy sandt voor die Ioden tot alle die lantscappen sijns rijcks, die welcke oock inden hebreeusschen boeck niet en is.