Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ESther die coninghinne is oock totten Heere gheuloden, vreesende tperikel datter aenstaende was,

+ A

2

Ende als sij die coninclijcke cleederen afgheleydt hadde, soo heeft sij cleederen aenghedaen die tot weenen ende rouwe bequaem waren, ende voor verscheyden costelijcke olien, heeft sij haer hooft bedect met asschen ende dreck, ende haer lichaem met vasten verootmoedicht, ende alle die plaetsen daer in dat sij te voren plach blijscap te hanteren, dien heeft sij met wtghetrocken hayr veruult,

3

Ende sij badt den Heere den Godt van Israel seggende. Mijn Heere die ons coninc sijt alleen, helpt een verlaten vrouwe, ende wien (sonder v) gheen ander helper en is,

4

Mijn perikel is in mijnen handen.

5

Ick heb van mijnen vader ghehoort dat ghy Heere Israel hebt genomen wt allen die volcken, ende onse vaderen wt alle hen voorleden ouderen, dat ghi die besitten soudt tot een eewige erffenisse, ende ghi hebt hen ghedaen ghelijck ghy ghesproken hebt.

6

⁺Wij hebben ghesondicht in v aenschijn, ende daerom hebdi ons gheleuert in die hant van onsen vianden,

+ B

7

want wij hebben hen goden ghedient, Heere ghy sijt rechtuerdich

8

Ende nv en eest hen niet ghenoech, dat sij ons met die swaerste slauernie verdrucken,

9

maer die cracht haerder handen der afgoden macht toe scrijuende willen sij v gheloften veranderen, ende v erffenisse te niet doen, ende sluyten die monden der gheender die v louen ende te niet doen die glorie ws tempels ende outaers,

10

om dat si der Heydenen monden souden open doen, ende louen der afgoden stercheyt, ende prijsen den vleeschelijcken coninck tot inder eewicheyt.

11

En leuert Heere uwen

[p. *423]

scepter niet den ghenen die niet en sijn, dat sij niet en lachen tot onse valle, ⁺Maer keert haerlieder raet op hen seluen, ende den ghenen die op ons begonst heeft wreet te sijne, verderft,

+ C

12

Weest ghedachtich Heere ende toont v ons inden tijt ons lijdens, ende gheeft my betrouwen Heere coninck der Goden ende van alle machtighen,

13

gheeft een welghemaect woort in mijnen mont in daenschijn vanden leeuw, ende verkeert sijn herte totten hate van onsen viant, op dat hy ooc mach vergaen ende alle die met hem consenteren,

14

Maer verlost ons door v hant, ende helpt my, die gheen ander helpe en hebbe, dan v Heere,

15

die kennisse hebt van allen dinghen, ende wel weet dat ick die glorie der booser menschen hate, ende dat bedde vanden onbesnedenen veronwaerde, ende van allen vreemden mannen.

16

Ghy weet mijnen noot dat ick verfoeye dat teeken van mijnder houerdien ende glorien, het welck op mijn hooft is, in die daghen mijnder vertooninghen, ⁺ende hoe dat ict versmade ghelijck dlaken van een maensuchtighe vrouwe, ende dat ict niet en draghe in die daghen mijns swijghens,

+ D

17

ende dat ick aen Amans tafel niet gheten en hebbe, ende dat my ooc niet behaecht en heeft des conincs maeltijt, ende dat ick niet ghedroncken en hebbe den wijn vander afgoden offerande,

18

ende dat v dienstvrouwe noyt verblijt en is gheweest, van dat ick herwaerts ouer ghebracht ben tot op desen dach toe, dan in v Heere Abrahams Godt

19

o sterck God bouen al, verhoort die stemme der gheender die anders gheen hope en hebben, ende verlost ons wt die hant der booser, ende verlost my van mijnder vreesen.

Dese woorden heb ick oock vonden in die ghemeyn translatie.