Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺Die alder grootste coninc Artaxerses van Iudeen totten Morianen landt den princen ende vorsten van hondert ende vijfentseuentich lantscappen, die onder sijn heerlijcheyt ligghen, salicheyt.

+ A

2

Als ick ouer veel volcs heerscappie hadde, ende alle die werelt onder mijn heerlijcheyt ghebracht hadde, soo en heb ic geensins die grootheyt mijnder macht willen misbruycken maer met goedertierenheyt ende saechtmoedicheyt mijn ondersaten regeren, op dat sij sonder eenighe vreese hen leuen stillijck ouerbrenghende, souden vrede gebruycken welc van allen menschen begheert wort.

3

Ende doen ick vraechde van mijnen raetsheeren, hoe dat dit soude moghen volbrocht worden, soo heefter een die in wijsheyt ende ghetrouwicheyt die andere te bouen ghinc, ende was den coninc die tweeste, Aman ghenoemt

4

my te kennen ghegheuen, ⁺dat in alle den omganck des aertrijcs een volc verstroeyt was, het welc ghebruycte nieuwe wetten, ende dat teghen alle der volcken ghewoonte doende versmaedde der coninghen gheboden, ende brack die eendrachticheyt van allen volcken door hen tweedrachticheyt.

+ B

5

Het welck als wi vernomen hadden, siende dat dit een volc wederspannich tegen allen geslachten der menschen verkeerde wetten ghebruycte, ende dede teghen onse gheboden, ende verstoorde den vrede ende eendrachticheyt der lantschappen die onder ons gheleghen sijn,

6

soo hebben wij gheboden, dat alle die ghene die Aman (die ouerste is ouer alle die lantscappen, ende die tweede naest den coninck, ende dien wi in die plaetse van onsen vader eeren) toonen sal, sullen vernielt worden met haer huysvrouwen ende kinderen van haren vianden, ⁺ende niemant en sal haerlieder ontfermen opden veerthiensten dach der twaelfster maent Adar, des teghenwoordichs iaers,

+ C

7

op dat die boose menschen op eenen dach ter ter hellen nederdalende, onsen rijcke vrede moghen wederom gheuen, den welcken sij verstoort hadden. Die woorden van sinte Ieronimus.

Tot hier toe is die copie vanden brief. Dat hier nae volcht heb ick ghescreuen vonden, nae die plaetse, daermen leest aldus. Ende Mardocheus heeft ghedaen al dat hem Esther beuolen hadde. Maer ten is nochtans int hebreeusch niet, noch by gheenen ouersetter en wordet ghestelt.

8

Ende Mardocheus heeft den Heere ghebeden, ghedachtich sijnde alle sijnder wercken, ende heeft gheseyt.

9

Heere Heere coninc almachtich, want onder v heerlijcheyt sijn alle dingen ghestelt, ende daer en is niemant die uwen wille soude moghen wederstaen, eest dat ghy voorghenomen hebt Israel te behouden,

10

Want ghy hebt ghemaect hemel ende aerde, ende aldat inden omganc des hemels begrepen wort,

11

ghi sijt die Heere van al, ⁺ende daer en is niemant die uwer maiesteyt wederstaen mach.

+ D

12

Ghy kent alle dinghen, ende ghy weet dat ict niet en heb ghedaen wt houerdien ende versmaetheyt, ende eerghiericheyt, dat ick den alder hoouerdichste Aman niet en aenbadt,

13

Want ick soude gheerne voor die salicheyt van Israel bereedt sijn oock die voetstappen van sijnen voeten te cussen,

14

maer ic vreesde dat ic mijns Godts eere, soude ouerdraghen tot eenen mensche, ende dat ick niemant aenbidden en soude wtghenomen mijnen Godt.

15

Ende nv Heere coninc God van Abraham ontfermt ws volcs, Want ons vianden willen ons vernielen ende uwe erffenisse te niet doen.

16

En versmaet v deel niet dwelc ghy voor v verlost hebt wt Egipten,

17

Verhoort mijn ghebedt, ende sijt ghenadich uwen deele ende seelken ende verkeert onsen druc in blijscap, dat wij leuende moghen louen uwen naem Heere, ende en sluyt den mont niet, der gheender die v lof singhen,

18

Ende gheheel Israel heeft met ghelijcker meyninghen, ende bedinghen gheroepen totten Heere, om dat hen die doot sekerlijck aenstaende was.