Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde hy woonde op dien tijt in des conincks hof, met Bagatha ende Thara des conincs ghesneden dienaers, die des pallays doorwaerders waren, Ende als hy hen ghedachten verstaen hadde ende hen sorchuuldicheden neerstelijc doorsien hadde,

+ A

2

⁺soo heeft hy vernomen dat sij arbeyden om die handen te slaen aenden coninck Artaxerses, ende hy heeft daer af den coninck die wete ghedaen.

+ B

3

Die welcke (alsser van beyde ondersueck ghedaen was, ende sij dat bekent hadden) heeftse doen ter doot leyden,

4

Ende die coninc heeft tgene datter ghesciet was doen scrijuen in die cronijcken, ⁺ende Mardocheus heeft oock die ghedenckenisse van dese dinghe bescreuen,

+ C

5

Ende die coninc heeft hem beuolen, dat hy in die sale des pallays soude woonen gheuende hem ghiften voor dat ouerbrenghen.

6

⁺Maer Aman die sone van Amadathi die Bugeus, was die alder gloriooste voor den coninc, ende hy heeft Mardocheo willen arch doen, ende sijnen volcke, om die twee ghesneden dienaers des conincs die ghedoot waren.

Die woorden van Sinte Ieronimus.

Tot hier toe was die prologhe. Dat hier naeuolcht was ghestelt op die plaetse daer gescreuen is int boeck. Ende si hebben hen goet gherooft oft hen substantien, het welck wij alleen vonden hebben in die ghemeyn translatie, maer dit was die copie des briefs.

+ D