Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺HIerom opden derthiensten dach der twaelfster maent die welcke wij nv te voren gheseyt hebben dat Adar hiet, als allen den Ioden bereyt was datmense doot slaen soude, ende doen hen vianden verlanghen hadden nae hen bloet te storten, so begonsten die Ioden ter contrarien die ouerhant te hebben ende hen te wreken van haren vianden.

+ A

2

Ende sij sijn vergadert tot allen steden ende plaetsen, dat sij die hant wtsteken souden teghen hen vianden ende veruolgers. Ende niemant en heeft dorren wederstaen, om dat die vreese van haerlieder grootheyt ouer alle volcken ghecomen was,

3

Want der lantscappen rechters, ende capeteynen, ende officiers, ende alle hooghe staten, die ouer alle besonder plaetsen ende wercken ghestelt waren, verhieuen die Ioden wt vreesen van Mardocheus,

4

⁺vanden welcken sij vernomen hadden dat hy een prince was des pallaeys, ende dat hi veel vermochte, ende die faem van sijnen naem wies daghelijcs, ende vlooch door den mont van allen menschen.

+ B

5

Aldus soo hebben die Ioden hen vianden gheslaghen met eenen swaren slach, ende sij hebben die ghedoot, betalende hen, dat si henlieden hadden bereydt te doen,

6

alsoo seer dat sij ooc in Susan vijfhondert mans dootsloeghen,

7

behaluen die thien sonen van Aman des Agagiters der Ioden viant der welcker namen sijn dese Pharsandatha, ende Delphon, ende Esphata,

8

ende Phoratha, ende Adalia, ende Aridatha,

9

ende Phermesta, ende Arisai, ende Aridai, ende Iezatha,

10

Die welcke als sij verslaghen hadden, soo en hebben sij gheenen roof willen nemen van haren goeden.

11

Ende ter stont is tghetal, der gheender die in Susan dootgheslaghen waren tot den coninck ouer ghebracht.

12

Die welcke heeft totter coninghinnen gheseyt. ⁺In die stadt Susan hebben die Ioden ghedoot vijf hondert mannen, ende noch ander thien Amans sonen, Wat moort meyndi dat sij doen in alle die lantscappen, wat begheerdi meer? ende wat wildi dat ick ghebiede te ghescieden?

+ C

13

Den welcken hy heeft gheantwoort. Eest dat den coninck belieft, Laet den Ioden die macht ghegeuen worden, dat sij morghen ooc doen moghen ghelijc sij heden ghedaen hebben in Susan, ende die thien Amans sonen laet hanghen aen galghen,

14

Ende die coninc heeft gheboden dat alsoo soude ghedaen worden. Ende ter stont wert in Susan tghebodt opghehanghen, ende Amans thien sonen sijn ghehanghen gheweest,

15

Ende als die Ioden vergadert waren opden veerthiensten dach der maent Adar, soo sijn in Susan drijhondert mannen ghedoodt, ende hen goet en is vanden Ioden niet gherooft.

16

Maer oock ouer alle die lantscappen die onder des conincs heerlijcheyt laghen, hebben die Ioden ghestaen voor hen zielen, dootslaende hen vianden ende veruolghers, ⁺alsoo vele dat het tghetal der verslaghenen tot vijfentseuentich duysent vol quam, ende dat niemant en raecte iet van haren goeden.

+ D

17

Ende den derthiensten dach der maent Adar was eenen dach by hen allen des dootslachs, ende op den veerthiensten dach hielden sij op van dootslaen. Den welcken sij hebben gheordineert tot eenen feestdach, dat sij op dien dach tot allen tijden voortaen souden hen gheuen tot goede chiere blijscap ende maeltijden,

18

Maer die ghene die in Susan den dootslach ghedaen hadden, hebben opden derthiensten ende veerthiensten dach der seluer maent met den slach becommert gheweest, ende opden vijfthiensten dach hielden sij op van slaen,

19

Ende daerom hebben sij den seluen dach ghestelt tot eenen feestdach der goeder maeltijden ende blijscappen. Maer die Ioden die in ombemuerde steden ende dorpen woonden, hebben den veerthiensten dach der maent Adar ghesteldt tot den dach der maeltijden ende blijscappen, Alsoo dat sij op dien verhueghen, ende senden malcanderen deelen vanden maeltijden ende spijsen.

20

⁺Hierom heeft Mardocheus alle dese dinghen ghescreuen, ende in brieuen begrepen heeft hy die ghesonden, die in alle des conincs prouincien woonden, soo wel den ghenen die by, als die verre gheleghen waren,

+ E

21

dat sij den veerthiensten ende den vijfthiensten dach der maent Adar voor feestdaghen souden ontfanghen, ende nae dat ommekeeren des iaers altijts dien souden met een hooghelijcke eere vieren,

22

om dat op die selue daghen, die Ioden hen ghewroken hadden van haren vianden, ende om dat die weeninghe ende droefheyt in een vrolijcheyt ende blijscap verkeert waren, ende dat dese souden wesen daghen der blijder maeltijden ende blijscappen, ende dat sij malcanderen deelen souden senden van spijsen, ende den armen ghiftkens gheuen.

23

Ende die Ioden hebben ontfanghen tot

[p. *421]

een iaerlijcsche maniere. alle die dinghen die sij te dien tijden hadden begonst te doen, ende die Mardocheus met brieuen hadde gheboden te onderhouden.

24

Want Aman die sone van Amadachi van Agags gheslachte der Ioden viant ende wederpartijder hadde quaet teghen hen ghedacht, dat hijse dooden soude, ende te niet brenghen, ⁺ende hy heeft gheworpen Phur, dat in onser talen wort ouergheseyt, lot,

+ F

25

Ende daer nae is Esther totten coninck inghegaen, biddende hertelijc dat sijn opstellinghen door des conincks brieuen souden te niete ghedaen worden, ende dat het quaet dwelck hy teghen die Ioden ghedacht hadde wederkeeren soude op sijn hooft. Voorts soo hebben sij hem ende sijn sonen aent cruys ghehangen,

26

ende van dien tijt sijn dese daghen ghenoemt Phurim, dat is der loten, om dat doen Phur dat is, het lot in die cruycke gheworpen was, Ende alle datter ghesciede, is begrepen inden brief, dat is int deel van desen seluen boeck, ende al dat sij gheleden hebben, ende datter voorts verandert is,

27

hebben die Ioden op hen ghenomen, ende op hen saet, ende op alle die ghene die met haer religie willen versamen, dat niemanden gheoorloft en sij dese twee daghen sonder hoochtijt voorby te gaen, welck dat ghescrift betuycht, ende die ander tijden der iaren wteysschen, die nae malcandere veruolgen sullen.

28

⁺Dit sijn die daghen die welcke gheen verghetelijcheyt emmermeer en sal wt vaghen, ende die door allen gheslachten alle die lantschappen in die gheheel werelt sullen vieren, ende daer en is gheen stadt daer die daghen van Phurim, dat is der loten, niet onderhouden en worden vanden Ioden, ende van haren gheslachte dat tot desen ceremonien verbonden is.

+ G

29

Ende Esther die coninghinne die dochter van Abihail, ende Mardocheus die Iode, hebben ooc ghescreuen den tweeden brief, dat met allen neersticheyt desen hoogen feestdach vast soude ghemaect worden in toecomenden tijden,

30

ende sij hebben ghesonden tot alle die Ioden die in hondert ende vijfentseuentich lantscappen des conincs Assuerus verkeerden, dat si vrede hebben souden ende ontfanghen die waerheyt,

31

onderhoudende die daghen der loten, ende dat sij die te sijnen tijde met blijscap souden vieren. Ghelijck Mardocheus ende Esther gheordineert hadden, ende sij hebben ontfanghen die tonderhouden te worden van henlieden, ende van hen saet, die vastenen, ende roepinghen,

32

ende der loten daghen, ende alle dat in die historie van desen boeck die Esther ghenoemt is begrepen is.