Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺MAer die coninck Assuerus heeft alle dlant ende alle die eylanden der zee tribuytarissen ghemaect,

+ A

2

wiens stercheyt, ende heerlijcheyt, ende weerdicheyt, ende hoocheyt, waer mede hy Mardocheum verhauen heeft, sijn bescreuen in die boecken der Meden ende der Persen,

3

ende hoe dat Mardocheus van der Ioden gheslachte, die tweede naest den coninck Assuerus was, ende groot by die Ioden, ende ghenaemden volcke van sijnen broederen, soeckende goet voor sijn volck, ⁺ende sprekende sulcke dinghen die tot den vrede sijns saets behoorden.

Des ouersetters sinte Ieronimus woorden.

Dat int hebreeusch is heb ic met volcomen trouwe wtgheseyt, Maer dese woorden die hier nae volghen heb ick gheuonden in die ghemeyn ouersettinghe, welck in griecscher talen ende letteren bescreuen sijn ende daer nae soo worde dit capittel nae deynde vanden boec ghestelt, het welc wij nae onse ghewoonte, met eenen obelus dat is met eenen spet gheteekent hebben.

+ B

4

Ende Mardocheus heeft gheseyt. Van Gode sijn dese dinghen ghedaen.

5

Ick ben ghedachtich gheworden des drooms dien ick ghesien hadde, ⁺dese selue dinghen beteekende, ende daer en is niet van dien voorby ghegaen.

+ C

6

Een cleyn fonteyne die ghewassen is tot een riuiere, ende is in dat licht ende sonne verkeert, ende heeft tot veel wateren ouergheuloeydt, dats Esther welck die coninc heeft tot een huysvrouwe ghenomen, ende heeft ghewilt datse coninghinne sijn soude,

7

Ende die twee draken, dat ben ic, ende Aman.

8

Die luyden die daer vergadert waren sijn die ghene die arbeydden om der Ioden naem te niet te brenghen,

9

Ende mijn volc dat is Israhel, dwelck heeft gheroepen totten Heere, ⁺ende die Heere heeft sijn volc behouden, ende ons verlost van allen quaden, ende hy heeft groote teekenen ende wonderlijcke wercken ghedaen onder die Heydenen,

+ D

10

ende hi heeft gheboden datter twee loten sijn souden, het een van Gods volck, ende het ander van allen den Heydenen

11

Ende beyde die loten sijn comen tot eenen ghesetten dach van dien tijt voorts voor Godt alle den Heydenen.

12

Ende die Heere heeft sijns volcs ghedachtich gheweest, ende heeft bermhertich geweest sijnder erffenissen.

13

Ende dese dagen sullen onderhouden worden in die maent Adar, opden veerthiensten ende vijfthiensten dach der seluer maent, met alder neersticheyt ende vrolijcheyt, in een gemeynte van dat vergadert volck, in allen die gheslachten voortaen des volcs van Israel.