Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺OP dien dach heeft die coninck Assuerus Esther der coninghinnen ghegheuen thuys van Aman der Ioden viant. Ende Mardocheus is binnen comen, voer des conincs aensicht. Want Esther heeft hem te kennen ghegheuen dat hi haers vaders broeder was.

+ A

2

Ende die coninck heeft den rinck ghenomen, den welcken hy doer sijn ghebodt van Aman hadde doen weder nemen, ende heeft dien Mardocheo ghegheuen. Maer Esther heeft Mardocheum ghestelt ouer haer huys.

3

Ende hier mede noch niet te vreden sijnde, is sij den coninc te voete gheuallen, ende heeft gheweent, ende sprekende tot hem heeft sij ghebeden, dat hy soude ghebieden datmen die boosheyt van Aman den Agagiter, ende sijn alder quaetste listich voernemen welck hy verdacht hadde teghen die Ioden, te niete dede.

4

⁺Ende hy heeft nae die ghewoonte den gulden scepter voerts ghesteken metter hant waer doer het teeken der goedertieheyt ghetoont worde. Ende sij opstaende heeft voer hem ghestaen,

+ B

5

ende gheseyt, Eest dat den coninck belieft, ende heb ic ghenade gheuonden in sijn ooghen ende dat mijn ghebedt hem niet en schijnt teghen te wesen, soe bid ic hertelijc, dat met nieuwe brieuen moghen verbetert worden die oude brieuen van Aman der Ioden listighen verrader ende viant, doer die welcke hy in alle des conincs lantscappen hen hadde doen dooden.

6

Want hoe sal ic moghen verdraghen die doot ende dat vermoorden van mijnen volcke?

7

Ende die coninc Assuerus heeft tot Esther die coninghinne ende Mardocheo den Iode gheseyt, Amans huys heb ick Esther ghegheuen, ende hem heb ick gheboden te cruycen, om dat hy hem verstout hadde sijn handt te steken aen die Ioden.

8

Daer om scrijft den Ioden ghelijct v belieft, wt des conincs naem, teekenende die brieuen met mijnen vinder rinck. Want die was die ghewoon-

[p. *420]

te, dat teghen die brieuen, die wt des conincs naem ghesonden worden, ende met sijnen rinck gheseghelt waren, niemant en dorstet segghen.

9

⁺Als dan gheroepen waren des conincs scrijuers ende notarissen (want het was den tijt vander derder maent die Syban ghenoemt wort) opden drijentwintichsten dach van die, sijn die brieuen ghescreuen, ghelijc Mardocheus ghewilt hadde, tot die Ioden, ende tot die princen, regeerders, ende rechters, die ouerste waren, van hondert ende seuenentwintich lantscappen, van Iudeen aen totten Morianen lant, elcken lantschap ende elcken volcke besonder nae hen talen ende manieren van scrijuen, ende den Ioden ghelijck sij lesen consten ende hooren,

+ C

10

Ende die selue brieuen die wt sconincs naem ghesonden worden waren met sijnen vingherinck gheseghelt ende gesonden door die posten die welcke loopende door alle die lantscappen souden die ouden brieuen, met die nieuwe bootscappen moghen voor comen.

11

Den welcken heeft die coninck gheboden, dat sij die Ioden souden aenspreken van steden tot steden, ende ghebieden dat sij tsamen vergaderden, om te staen voor hen zielen, ende dat sij allen hen vianden met haren huysvrouwen ende kinderen, ende allen hen huysghesinnen souden dootslaen, ende te niet doen,

12

Ende daer is door alle die lantscappen ghestelt eenen dach der wraken, dat is den derthiensten vander twaelfster maent Adar,

13

⁺Ende het inhout des briefs int corte was dit. Dat in allen landen ende volcken, die onder des conincs Assuerus heerlijcheyt laghen, soude kenlijck worden, dat die Ioden bereyt waren om wrake te nemen van haren vianden.

+ D

14

Ende die rassche posten sijn wtghereyst, draghende ouer die bootscappen, Ende des conincs ghebodt heeft ghehanghen in Susan,

15

Ende Mardocheus vanden pallayse ende van des conincs aensincht wtgaende, blincte in coninclijcke cleederen, te weten met hemels blau ende gheelverwighe sijden cleederen draghende een gulden croone op sijn hooft, ende bouen ghecleedt met eenen sijden ende purpuren mantel, Ende alle die stadt is verhuecht ende blijde gheweest,

16

Maer den Ioden scheen een nieuwe licht op te staen, blijscap, eere, ende Iolijt,

17

In allen landen, steden, ende lantscappen werwaerts dat des conincs gheboden quamen, was een wonderlijck verhueghen, maeltijden ende goede chiere, ende feestdach alsoo grootelijck datter veel menschen van anderen volcken ende secten, versaemt worden met haren godsdienst ende ceremonien, Want een groote veruaertheyt vanden Ioetschen naem haddese alle gader beuanghen.